Chronijcke van Ghendt

XV^c LXXXVIII.

....Jn dit zelve jaer... den XX April, waeren te Brugghe van onse Ghendtsche bootsknechten, die te vooren woorden ghehadt hadden te Sluys jeghens de bootsknechten van Brugghe, zoo dat die van Brugghe die van Ghendt hieten Stropdraghers, zoo dat die van Ghendt hemlieden vermaten dat zij hemlieden dat wijs maecken souden binnen Brugghe. Ende commende te Brugghe, hebben elcanderen vonden jnde stadt ende hebben jeghens elcanderen ghesleghen, zoo datter doot

[p. 384]

bleven zijn thiene van Brugghe ende viere van Ghendt. Ende hadde de prince niet ghecommen te naganghe uuyten velde, die gheheele stadt begoeste thoope te loopen, maer hij payseerdet, dwelck die van Brugghe wel onthouden moghen.

....Jn dit zelve jaer, den XI Mey, zoo quamen te Ghendt anne tschepe uuyt Hollandt ende Zeelant al vande guene, die te vooren uuyt Vlaenderen ghevlucht waeren, meenende jn Zeelandt bet te sijne dan jn Vlaenderen, wel tot den nombre van vier zo vijf hondert persoonen. Ende (zij) moesten alle ghereconselliert zijn, commende bij schepenen. (Zij) waeren tschepe duerghesonden naer Audenaerde ende naer Rijsel; vandaer zij waeren van weelden wech ghegaen ende van aermoede wederomme commen, elck naer tsijne thuuswaert.

Den XXVII Julij dede den bisschop van Ghendt sijnen jntrey ter Brugscher poorte jnne, ende wert jnne ghehaelt met den apt van sente Pieters ende den apt van Dronghenen, raedtsheeren, schepenen ende veel edelmannen, zeer magnefijckelic met de vier oordens, beghijntkens, den capitein vanden casteele ende meer andere, metgaders een groot getal vande cloucste borghers jn een schoone ordonnantie; ende naer het celebreren vanden goddelicken dienst zoo wiert de blijde maeltijt ghehouden jn thof van sente Baefs. Ende es te weten dat ditte was den eersten bisschop naer tovercommen vande zelve stede van Ghendt.

....Up sente Jansdach, uuytgaende Ougste, was den balliu van Audenburch, sente Pieters ende van sente Baefs wel met een vijftich soldaeten vanden casteele buyten de Brugsche poorte, om de guesen te bespringhen, die zij verioughen en brochtender twee met hemlieden; maer zij waeren doot jnbrocht.

....Jn dit zelve jaer, upden XV Septembre, wiert upde Ketelpoorte tot Ghendt wederom een nieu beelde

[p. 385]

van onse lieve Vrauwe ghestelt ende was doen doen bij eenen doctuer, ghenaemt Vossius; hij hadde pastoir van onse lieve Vrauwe tsente Pieters gheweest, maer hij studeerde hem simpele, waerom hij afghesedt wiert; welcke beelde hij aldaer zelve gaf tot ghedinckenisse vande moeder Godts.

....Den XVI Septembre was bij trompette gheboden datmen den XVIII Septembre soude processie generael draghen ter memorie van tovercommen vande stadt van Ghendt, gheschiet vier jaeren te vooren.

....Jn dit zelve jaer, den VIII Octobre, waeren binnen Ghendt sommighe hoeren up eenen waghen ghestelt ende alsoo met een musele naer tbordeel ghevoert. Dese hoeren waeren woonende ontrent den Schepenhuuse, ende dit exploict ghebuerde van eenen Jo^r Gillis vander Meere, schepene vander kuere, die alsdoen het onderballiuschap van Ghendt bediende, midts dat Jo^r P^r van Overbeke alsdoen jn zijn eyghen huus zijn vanghenesse moeste houden om zeker delicten, diemen hem aenseyde.

Ende ontrent desen tijt quamen alle de schepen wederom binnen Ghendt, die jnden dienst vanden prince ter Sluys ende elders gheweest hadden, ende voor een memorie zo wiert de Liefbrugghe bijden Augustijnen om dese schepen wille drij reysen up een jaer afghebroken ende wederom upghemaect.

...Ontrent den XVI Novembre was te Mariekeercke levende verberrent eenen Guillaume van Dale, gheboren van Deinse, die te vooren capitein vande guesen gheweest hadde, die ghewoont hadde Onderbeerghen, alsdoen een rijck coopman was... Van Dale die hadde gherooft ende vier moorden ghedaen.

....Jn dit zelve jaer, den V Decembre, was upden Coorenaert binnen Ghendt jnt Clephuus een groote roere, van ten elfven tot den twaelf hueren, jnt princi-

[p. 386]

paelst vanden haert, de weerelicke heeren jeghens de broeders vanden rijcken gasthuuse. Ende de cause was om den lepele. Elck wilde daer recht aen hebben, maer het verghinck noch al redelic wel; maer de cleppe was ghesleghen tweesins, maer emmers, metten cortsten gheseyt, de broeders behielden haer recht.

Item upden VII der zelve maent, wesende woensdach, zoo ghebuerder wederomme een leelicke rommelinghe, want de broeders quamen up Clephuus metter cleppe ende mette lepels om haerl. officie ordinaire te doene ten elf hueren; ende met dat de weckers vanden elf hueren ghinghen slaen, quam den bailliu met schepenen ende den pensionaris Schoorman ende namen de broeders cleppe ende lepels. Ende daer wiert overlic ghewurstelt, ghetrocken ende ghecioocht, zoo dat ten eynden de broeders ghevanghen wierden ende ghesedt tot de Cellebroers.

Ende up desen zelven dach passeerden duer Ghendt wel acht hondert Hierschen, die tschepe van Dendermonde quamen ende trocken naer Oudenborch, soomen seyde.

Item alsoo hier vooren gheseyt es vande broeders vanden Rijcken gasthuuse, zoo es de questie nu commen jn processe bij mijne heeren vanden Raede jn Vlaenderen, zoo dat ten eynden de broeders vanden rijcken gasthuuse gheoptineert (hebben) ende creghen wederomme de cleppe ende lepele.