Chronijcke van Ghendt

XV^c LXXXVII.

.....Jn dit zelve jaer, den XXV Januarij, verbranden de guesen gheheel Deinse met den hospitaele ende (dit) gheschiede meest tot vrake vande voorgaende ghehanghe persoonen, hier vooren verhaelt ende boven al om datter een zijn oore afghesneden was.

.....Item ontrent dese tijt roofden de guesen twee schepen boven Deinse, daer zij veel schade jnne deden, ende droughen veel fluweelen ende zijden laeckenen mede; zij storten ooc veel wijns ende wierpen de boter ende caes over boort jnde Leye, ende deden groote schade jn hals (sic) ende ooc jn drooghen visch.

.....Item de aermoede groeyde noch alle daghe binnen Ghendt, zo dat den schrijver van dese jnde halfvasten weke zach van hongher nedervallen de aerme meinschen ende en coesten zonder hulpe niet upstaen.

.....Item alsnu ontrent Paesschen was te Ghendt de brandtwacht afghesedt ende daer was gheordonneert datter wederomme zouden roepers achter straete gaen, van straete te straete, ende roepen: ‘Wacht hu vier, hu keerslucht wel’ enz. zoo hier voormaels plochte te sijne. Item de principale wacht wiert ooc verandert dat de borghers maer waecken en souden alle twaelf daghen, die alle zes daghen plochten te commen; ende het moeste al waecken, edele ende onedele. Daer wiert oock ghestelt eenen stuver up elcken stoop wijns ende eenen schellinck up een dobbel tonne biers, ende was gheseyt dat dit was ghedaen omme de aermen die

[p. 382]

jn soo grooten ghetalle achter straete liepen, te secoureren, ende ooc omme te secoureren sommighe edelmans ende vrauwen ende andere heerlicke borghers, daer secretelic groote aermoede jn huus was duer tvague ligghen van huerl. goedinghen.

.....Item voor een memorie vanden dieren tijt zo zal den leser weten dat den schrijver van dese heeft ghesien met eenen Jacop Goemaere, die bij mij was bij sPrincen hof, upden XXVI Mey jn dit voors. jaer, een maerte die uuyt een huus quam ende goot up strate eenen corf met groensele, dat niet en docht, van cruyt dat zij verlesen hadde ende buelinghen van visch ofte eenighe poelgerie; ende terstont wasser een volwassen meyssen aen, ende van verre eenen knecht, dat siende, ooc groot zijnde, liep dauwaerts, ende bijeen zijnde vochten daeromme ende trockent elcanderen uuyten handen, soo groot was den hongher binnen Ghendt.

Jn dit zelve jaer, jnde Sincxen daghen, quamen de Sluseneers binnen Thielt jnde keercke ter wijlent datmen de messe dede ende vinghen den pastuer ende verre al die jnde keercke waeren, ende roofden al dat zij daer vonden ende trocken alsoo mette proye naer Sluys.

.....Jn dit zelve jaer, corts hier naer, tusschen den zondach ende den dijsendach (begin Juni), passeerden duer Ghendt meer als vier hondert waghens ende wel vijftich veendelen soldaeten, zoo peerderuyters als andere. Ende up desen zelven dijsendach passeerden oock twee zoo drij regimenten pioniers ende trocken alle de Brugsche poorte uuyte; ende men seyde nu dat zij naer Sluys ende Oostende trocken, ende het gheschut track vooren ende naer jn grooten ghetalle ende zeer menichfuldich.

....Jn dit zelve jaer, den XXV Augustij, was te

[p. 383]

Ghendt bij trompette verboden upde straeten niet te moghen dansen om hoeden ofte opeelkens. Ende was oock verboden upden ban ende gheesselinghe dat gheene en mochten upden aert cooren meten dan diet te coope brochten. Ende daer was noch gheboden datmen alle dijsendaghe aen mijne heeren vande wet zouden bereet sitten om recht ende wet te doene van alle gheschillen ende questien, die tusschen de borghers vande stadt soude moghen uprijsen ofte gheschien. Ende de backers en mochten niet coopen voor den een hueren, ende en mochten ooc gheen mesteluyn broot backen ende dat om de eercheyt, die zijlieden jn dat minghelen deden.

.....Jn dit zelve jaer, den XXIIII Septembre, was de wed^e van m^r Jan Onghena binnen Ghendt ghegheesselt ende uuyt sconincx landen ghebannen om dat zij up Hollandt ende Zeelant brieven ghehaelt ende ghedreghen hadde. Dit was de weduwe vanden zelven m^r Jan Onghena, die jnde eerste keerckbraecke capitein vande keerckbrekers was ende binnen Ghendt om de zelve zaecke upden Coornaert ghehanghen wiert....