Chronijcke van Ghendt

XV^c LXXXVI.

.....Item alsnu jn desen tijt (half April) rees binnen Ghendt de dierte ende aermoede lancx om meer, dat niet schrijvelic es, jae ongheloovelic, zoo dat sommighe meinschen haeten dat niet hetelic en was, zoo dat de meinschen leefden met zulck een vernoeyen dat zij bijcans om de doot riepen; ende trocken uuyt der stadt met zulcken ghetalle dat albij het derde huus ter huere ofte te coope was, zoo dat de blijvers met cleene winninghe zaeten. Ende was ooc binnen Ghendt onder tghemeente zulck eenen hongher, dat de aerme lieden de hoopen met de vuyllicheyt, diemen uuyt de huysen wierp, duersochten, openspreeden om te siene offer yet jnne lach dat hetelic was, ende raepten daeruuyte appelschellen, graeten, beenen ende zulck goet, atent, cnaechdent, lectent ende pluysterdent dat compasselic was om siene; jae aeten de vuyllicheyt vande visschen, dat onder de vischbancken lach, dat niet hetelic en was. Het broot wiert ghenomen daert te coope lach; men namp de lieden ofte kinderen de boterammen, diese up straete saeten ende aeten, uuyt den handen ende men lieper mede wech. De faminie was zoo groot, dat niet om schrijven en es, ende men sach oock binnen Ghendt zoo menich schoon huus

[p. 379]

ledich staen, ende dat noch deerlicker was, dat was datmer zoo menich schoon huus zach jn veel plaetsen jn sticken trecken, als ghevels, rebben, dueren ende veinsters breken ende wechdraghen. Ende daer en was niemant dieder teghen was ofte wat toe dede, noch van wet weghe noch van andere.

....Den XII Junij quam de tijdinghe dat capitein Cleygat ghevanghen was ontrent Meerelbeke, ende noch eenen met hem, den welcken veel quaets ghedaen hadde met uuytloopen, uuyt Sluys, hier jnt quaertier van Deinse ende daerontrent; hij was ghevoert binnen Aelst, midts dat hij upde heerlichede van Aelst ghevanghen was, ende tsanderdaechs den XIII Junij reet den procureur generael ende den onderbailliu van Ghendt met den bailliu vander Auderburch ende noch meer andere met den scheerprechter naer Aelst om te gaen examineren. Desen Cleyngat met zijne medegasten was een staut voghele; doen hij ghevanghen was, hadde hij snachts gheweest tot upde brugghe van Montoyens huus, te Meerelbeke, meenende wel Montoye ghecreghen thebben, maer Godt en wildet niet; duer een, dieder ghevanghen was van zijne ghesellen, bleef hij noch daerontrent, verbaest zijnde ofte den wech niet wel wetende, heeft duer een decspaen met een stocxken jnde handt gaen al spelende, zonder gheweere, uuyt dobbelheyt, achter den velde. Ende hem es te ghemoete aen ghecommen up een velt den bailliu vande plaetse, die hem zeer wel kende, ende wiert van hem ghevanghen ende naer Aelst ghevoert.

....Item eenen man, die upden XI April LXXXVI voorschreven jnden Raedt verwesen was te brandene, belast hebbende eenen die noch ghevanghen sat ende starffer de doot jnne, dat die ghevanghen bleef tzelve feyt ghecommiteert hadde, wiert twee mael afgrijselic ghepijnt; ende de derde reyse zoo was doen

[p. 380]

maecken eenen ijseren rijnck, met scheerpe pinnekens om hem over hende mede te houden staene dat hij niet slaepen en soude, dwelck hij verdrouch twee daghen ende twee nachten al staende, ende al sittende noch vier daghen ende nachten sonder slapen, want waer hij thooft dwanck, viel jnde pinnekens, hem steckende jn zijnen hals; ende dit al verdreghen hebbende ende niet ghekendt, was upden XXIIII Julij LXXXVI vrij ende los ghelaeten.

.....Item naer tinnemen van Axele seyde eenen temmerman ofte schrijnweerckere, ghenaemt Artus: ‘Binnen Ghendt zal men nu de groote clocke niet luyden alsoo men dede als (de) grave overquam.’ Daeromme was hij, metgaeders om noch meer andere leelicke blamatien ende gheckernien, die hij gheseyt hadde, voor schepenen ende voorts rontomme de vier pilaeren ghegheesselt ende thien jaeren uuyt Vlaenderen ghebannen.

.....Jn dit zelve jaer, up onse Vrauwen dach half Ougste, wayst een groot onwedere van donderen ende blicxemen, ende was aen sente Jans torre veel schaillien afgheworpen vanden viant (sic) ende tsente Pieters Grijspeerens torreken, dat recht over de Bagattestraete staet, was ooc gheheel gheschonden; ende ter Muelestede was ooc schade aen een muelen ende aen een vrauwepersoone.

.....Jn dit zelve jaer, den XXVI Ougste, vertrocken wederom uuyt Ghendt veel volcx om dat zij haerlieder religie niet en mochten ghebruycken, waerduere de stadt zeer ijdel wiert van volcke, zoo datmen jn veel straeten sach peerden ende coeyen weeden duer de verwoestheyt vande stadt.

.....Jn dit zelve jaer, jnde leste weke van Octobre, ghinghen de pastuers elck jn zijn prochie omme ende schreven de lieden al up, zoo wel die onder haer

[p. 381]

jaeren waeren als daerboven; ende men seyde dat was om hemlieden te bringhen tot subiectie vande heylighe catholijcke keercke.