Chronijcke van Ghendt

[p. 347]

XV^c LXXXIII.

...Item alsnu jnt beghinsel van Februarij zoo waeren binnen Ghendt briefkens ofte paesschillen ghesaeyt, jnhoudende up dicht zoo hiernaer volcht; ende wierden up hondert guldens ghestelt, zoo wiese coeste vinden, luydende aldus:

Wildi ghemeyn en lieven

tsamen een potken clieven

vanden Spaenschen wijn,

zoo zoude den zack met den maroten
over den plasch moeten gaen troten

met Fransken, zijnen cosijn.

....Desen XXIX Octobre wierden up sente Pieters gheforiert een cornette peerde volck Jnghelschen ende Schotten....

Item dese bovenscreven Jnghelschen ende Schotten, die up sente Pieters gheforiert waeren, trocken upden V Novembre jn dit voors. jaer uuyt Ghendt ende ghinghen rooven, moorden, branden, vrauweschenden ende al het quaet, dat zij coesten, up Exaerde, onder weghe Andwerpen, ende brochten mede twintich Malecontenten, die alle tot den gheweldighen provoost gheleyt waeren; brochten voorts noch mede een groot ghetal coeyen ende schapen, zoo dat zij een koe gaven voor vier, vijf, zes, zeven ende acht guldens, ende de schapen naer advenant. Ende tconvoy, dat naer tlandt van Waes (trock), die wierden ghesleghen ende afghenomen huerlieder foeraige vande Wasenaers ende (deze) riepen up die van Ghendt: ‘Comt uuyt, ghij keerckroovers! ghij keerckbrekers van Ghendt!’ alsoo tooghende viantschap van die van Ghendt. Ende het voetvolck track ooc daghelicx uuyt Ghendt naer het Landt van Waes ende jnde Vier Ambachten rooven ende branden huusen ende muelens, ende de Malecontenten deden ooc vande ghelijcken over dander zijde.

[p. 348]

....Jn dit zelve jaer, den XIII Novembre, was Blaseris goeyken, buyten de Petercelle poorte, verbrant met noch andere, wesende een forteresse ende steerck van wallen, vauten ende gheschut daerup.

....Jn dit zelve jaer, ontrent half Novembre, zoo was Jan van Jmbiese brudegom worden met de dochter van Augustijn van Huerne, een dochter van ontrent de XXV jaeren audt, daerjnne tvolck zeer verwonderde dat den burgmeester zulc een jonghe dochter traude.

....Jn dit zelve jaer, upden vierden van Decembre, ten vier hueren naer noene, zoo wiert den voorseyden voorschepenen Jan van Jmbiese ghetraut tot den Predicheeren.

Jn dit zelve jaer, den VII Decembre, waeren jn Ghendt veel catholijcke borghers ghevanghen, ende vele ter stadt uuytgheseyt. De occasie was om dat zij goet catholijcx waeren ende wierden daeromme voor verraeders gheextimeert, zonder eenige andere cause, twelck was een groote tieranie, waer onder andere waeren dese naervolghenden. Eerst eenen Jan de Backere, Philips Gansman, Lieven ende Christoffels vander Haghen, ghebroeders, ende meer andere, zijnde jn ghetalle van ontrent eenenvijftich, ende twas zeer deerlic om siene het gheschrey ende droufheyt van huerlieder vrauwen ende kinderen⁽¹⁾.

....Jn dit zelve jaer, den X Decembre, moesten binnen Ghendt alle de ghevluchte landtslieden haerl. peerden upden Cauter bringhen, smorghens ten acht hueren, up verbuerte vanden peerde. Ende wierden daer jnt amonitiehuus bij eenen m^r Adriaen vander Spurt verre al gheteeckent mette lettere G, speciaelic hijncxsten ende ruynen, ende ooc meerien die zeer goet waeren.

(1) Zie de andere namen bij De Jonghe, II.