XVc LXXIV.
.... Item alsnu jn desen tijt zoo was tplatte landt also zeere verlast van soldaeten als jn hondert jaeren jn Vlaenderen ofte Brabant gheweest hadde. Soo waer dat soldaeten quamen, tsij Spangnaerden, Italiaenen ofte Waelen, zoo deden zij zulcke exactien van costelicke spijse, wijn ende ghelt te doen gheven, dat niet lijdelic noch verdraghelic en was, ende om dat dicwils langhe rees eer dat zij den wijn ofte spijse cousten ghecrijghen, mids dat zulcx upde durpen niet over al en es, zo vonden zij een jnventie dat hemlieden volchde zulcken wijn als zij begheerden te drincken, ende deden datte de landtslieden betaelen.
..... Jn dit zelve jaer van XVc LXXIIII, den XIX Februari, waeren ten Chartruesen twee religieusen ende meenden tclooster te rooven; zij bonden den patere ende namen hem zijn ghelt, ende midts zij den costere ooc ghebonden hadden, duer dien zij hem gheen gaede en sloughen, die ontquamt ende onbant hemzelven ende slootse jnden choor, die wijle dat zij met het pilgieren besich waeren, ende wierden ghevanghen ende sdaechs daernaer wierden zij up Meerhem ghevoert.
Auteursrecht onbekend