Chronijcke van Ghendt

(1885)–Jan van den Vivere– rechtenstatus


XV^c LXXIII. .... Jn dit zelve jaer, den XXII Mey, was buyten de Petercelle poorte levende verbrant capiteyn Beck, smet van zijnen ambachte, om dat hij hadde helpen priesters vermoorden ende rooven... ....Jn dit zelve jaer, upden XXX Mey, was buyten de Keyserpoorte aen eenen boom ghehanghen eenen Clays Jacops, vande zelve bende, want zij tsamen waeren ghevanghen buyten Deynse. Desen Clays hadde gheweest brauwere jnden Caerpele, ande Waelpoorte. Hij hadde hem bijde guesen ghevonden ende up tlandt gherooft.
[pagina 268]
.... Jn dit zelve jaer, den XXVI Maerte, was te Ghendt bijde heeren vanden Raede onthooft eenen ontfanghere vande confiscatie, ghenaemt Haesbyt, ende wiert onthooft jn eenen dronckaerts stoel gheheel nieuwe ende viel naer tonthoofden van achterwaerts omme dat den zelven stoel jn twee plaetsen brack. Ende ontrent de goe weke daer naer was van sprincens volck ende volck van Rousselles een groote vlote van Spaensche schepen afghesmeten, alwaer groote schade was van volcke van beede zijden.