Chronijcke van Ghendt

XV^c LXXII.

.... Jn dit zelve jaer, den lesten Junius, quamen vier hondert guesen binnen Eeckeloo ende voerden met hemlieden den pastoir, den capiteyn, den bailliu ende den burgmeestre. Ende zij vonden jnde Zwaene vier Spaengaerden met een tonneken ghelts om peerden te gaen coopen ende nament ghelt ende leeden de Spaengnaerden mede naer Herdenburch.

.... Item den pastoir van Eeckeloo, die de guesen

[p. 267]

vanden Briele tEeckeloo ghevanghen hadden, zoo voorseyt es, die was alsnu ontrent den VI Julij jnden Briel jn deser manieren ghedoot. Alder eerst sij sneden hem af beyde zijn ooren ende zij staecken hem die jn sijnen boeseme; ende sij hadden een coorde, daer eenen haeck hanne was, die den buel jn sijne verhemelsche slouch jn sijnen mont, ende was alsoo upghetrocken ende alleene daer laeten hanghen steerfven; ende bleef levende, zoomen zeyde, drij daghen. Ende de vier Spaengnaerden, die met hem ghevanghen waeren, wierden ooc ghehanghen upde zelve huere, up elcke zijde vanden pastoir twee Spaengnaerden. Alsoo leefden de guesen met de catholijcke, ende principalic metten pastoir, duer de quaede rapporten van verloopen guesen van Eeckeloo om dat hij se hadde willen bringhen tot de Roomsch religie; ende niet willende daertoe verstaen, liepen zij over bijde guesen, daer zij van hem veel quaets ende groote lueghenen bij vouchden, duer haet ende nijt, die zij hem droughen, zoo dat zij jn deser manieren alsoo met hem leefden, nochtans niet anders ghedaen hebbende dan eenen pastoir schuldich was van doene.