Chronijcke van Ghendt

XV^c LXIX.

...Jn dit zelve jaer, den II Meije, waeren upde Vrijdachmaerct levende verbrant Jooris Raverick ende Lauken Straetman. Ende Lauken ghinc al singhende ter doot waert een liedeken, dat hij ghemaect hadde jnde vanghenesse, jnhoudende van al tguent dat ghebuert was sichtent den tijt, dat hij voor duc dAlbe jnnegedaecht was.

...Jn dit zelve jaer, upden XVIII Mey, waeren twee Spaengaerden ofte Italiaenen upden wech van Corterijcke bijden Gapaert, up tnederhof van Wallebeke ende stelden huerlieder peerden jnden stal vanden heere van Wallebeke; ende den knecht van mijn heere van Wallebeke, commende van Ghendt, vant beede dese peerden staende jn zijnen stal, ende meende mijns heeren peerden daerbij te stellen, dwelc de Spaingnaerden niet ghedooghen en wilden, soo dat se gheschil hadden, soo dat den knecht moeste loopen ende zijlieden daerachtere met bloote rapieren; ende zij jaechden hem tot jnt spachters huus; daer duerstaecken zij hem duer zijn handt, dwelc up zijn bust lach ende voorts duer tgheheele lichaem, dat hij voetstaens starf. Ende was den cosijn van Daneel jn de Roose, upde Hoochpoort...

...Jn dit zelve jaer, den XXI Mey, smorghens ten

[p. 262]

twee hueren, verbranden upde Veerle plaetse onder tsgraven casteel vijf huusekens.

Jn dit zelve jaer, den XXVII Mey, zo was naer den noene voor sgraven casteel onthooft den amman van Knesselaere, ghenaemt Jan vanden Dendere, om dat hij jnden troubelen tijt misdaen hadde jeghens de magesteyt; te weten als die van Audenaerde waeren gaen preken voor Brugghe, soo sant mevr. van Praet aen desen hueren amman een briefken, jnhoudende dat die van Audenaerde jnt wederom keeren van Brugghe commen soude met huerlieder predicanten ten huuse van mevr. van Praet, ghebiedende up tkeerchof alle die guene, die wilden commen hooren het sermoen van Carpentier, dat se vrij commen souden zonder yet te mesdoen; ende Jan vanden Dendere, vulcommende tlast van zijne meestersse, heefter omme moeten steerfven ende zijn goet gheconfisquieert. Voorts hadde hij noch jn eene taveerne met luyder stemmen sitten singhen guessche salmen, jnt lijden vande processien, jn spijte vande zelve processien, nochtans zelve eene lichaem vande wet zijnde, ghevende andere quaede exempele ende noch meer andere quaede feyten ghecommitteert jeghens de catholijcke religie.

...Jn dit zelve jaer... den XXVII Ougste, waeren tsente Pieters twee brekers onthooft, te weten Jan Andries, f^s Cornelis, ende was begraven up tkeerchof, om dat hij catholijc starf; ende den anderen was ghenaemt Jan Veytens ende was begraven anden Poel up tonghewijde aude Cloostermaerct, om dat hij jn sijn quaede opinie gestorfven was. Zij waeren beyde tijcwevers.