Chronijcke van Ghendt

[p. 197]

XV^c LVI.

Jn dit jaer, den XXVIII Julij, was binnen der prochie van Wettere eenen man levend verbrant, hanghende aen een polije, die verkendt hadde ghedaen thebben derthien moorden.

Jn dit zelve jaer, den XI Ougste, quam den keyser Carolus binnen Ghendt, ende den XIII der zelve maent quamen ooc binnen Ghendt twee coninghinnen, te wetene Elionora ende vrau Marie; ende den XVI der zelver maent, al jnt zelve jaer, Philips, Carolus zone, waerom groote ghenouchte ende blijtschap was binnen Ghendt. Ende noch quam binnen Ghendt de hertoghinne van Loreynen, de dochter van Christierne, coninck van Denemeercke, die hij hadde bij Ysabelle, des keysers derde sustere.

Alle dese princen ende princessen waeren ghelogiert jnt hof van Egmont ende jn die poorters huusen daerontrent. Ende den keyser was ten huuse van mijn heere van Wackene, hoochbailliu van Ghendt. Doen bedreef men veel ghenouchten, want men stack jnde Cooreleye, ende men triumpheerder te waetere om prijs. Daer zachmen menighen schoonen standaert ende pingnioen blijncken; daer hoordemen trommelen, feyfelen ende trompetten, schalmeijen ende dier ghelijcke overvloedich. Aldoen was daer eenen Joos van Huerne, gheseyt Payskindeken, eenen frutenier, een vet, vroom man, die stact daer al af ende ghinck drooghe vande laede, dwelc hij up andere tijden te vooren noch dicmael ghedaen hadde; waeromme hem den coninck van Spaignen, Philips, dede schincken voor zijnen aerbeyt twaelf gouden croonen. Ende alsdoen wasser ooc ghestelt een drayende huuseken, up eenen mast uuyt den waetere, dwelck moeste beclommen zijn om prijs, ende ditte hiet: thusekin van Maestricht, om

[p. 198]

dat die van Maestricht zulc eene hier stelden jnt schietspel vanden cruysboghe jnt jaer XIIII^e XCVII. Ende daer clommen jnne drij persoonen, den eenen ghenaemt Frans Clemme; ende alle dandere wierden ghedrayt ende van boven neder gheslinghert jnde Leye, dwelc gruwelic om siene was hoe sij daeran hinghen; maer den wijc vanden Coorenaert hadde den upperprijs jnt stecken, daer Joos van Huerene voornoemt dheere bewaerde. Ende corts hier naer vertrack den keyser naer Zeelant ende alsoo naer Spaignen.

....Jn dit zelve jaer, den XXIX Januarij, was bijden souverein buyten Sente Baefs ghedaen verberrenen een vrauwe persoon, ghenaemt Griete Lachaerts, gheseyt Quae conte. tWas een aerme onghevallich vrauken, als een rijbausterigghe, welcx schoenen met wissen ghebonden waeren; die kende onder andere ghedaen ende helpen doen hebben XVI moorden.

Jn dit zelve jaer, upden VI van Maerte, was upde Veerle plaetse, up een schavaut, onder een galghe onthooft eenen Mahuu de Vos, ontfanghere gheweest van Vuerne.

Jn dit zelve jaer, den XIII Maerte, was bijde wet van Sente Pieters ghecondempneert gherecht te sijne met den zweerde, thooft onder den staeck ende tlichaem up een rat, eenen Philips Bancdonc, mandemaeckere, om dat hij zijn beste ghedaen hadde om te vergheven met ghefenijnde wafelen eenen Marten Fonteyn, bailliu zijnde van sente Jans keercke, ende ooc zijn huusvrauwe, omdat zijlieden hadden XXIIII schilden tsiaers thaerlieder lijve, lancx levende, gheheel heffende up zijn ghecochte huus, staende S^te Pieters tSpriete, jeghens over de linde, waeraf zijlieden zeer cranck waeren, maer niet en storfven; maer men seyde onder duyme, dat hij twee van zijne zusters ooc daer te vooren vergheven hadde, die seer subbijt storfven deen naer dandere.