Chronijcke van Ghendt

[p. 195]

XV^c LIV.

Jn dit jaer, den IX Novembre, waeren bij dheeren vanden Raede, ten verzoucke vanden procureur generael, ghecondempneert vijf dienaers deser stede, amende te doene⁽¹⁾..... Ende daer was dit dichtken up ghemaect, te weten:

Den IX Novembre wasser ghevanghen vijfve

Die alle hadden gratie vanden lijve,

Hemlieden waeren doen draghen hallebaerden bij fortsen,

Doen sij quamen tS^te Jans wordent alle tortsen,

Als zij wederomme quamen voor den crocht

Seyden sij: o vermalendide officie, waer hebt ghij ons brocht!

Jn dit zelve jaer van XV^c LIIII was bij schepenen vande kuere ghegheesselt ende ghebannen XII jaer uuyt den lande van Vlaenderen eenen ghenaemt Lambrecht Ghijsbaert, van Zoutleeuwe, waeraf de copie vande sententie, uuytghegheven den XI decembre XV^c LIIII, hier naer volcht van woorde te woorde:

Omme dat ghij, Lambrecht Ghijsbaert, van Zoutleeuwe, hoe ghij anders ghenaemt ofte ghebijnaemt zijt, vervoordert hebt jn zekere vergaederinghe van diveersche schiplieden, zo wel van deser stede van Ghendt als vremde van Mechelen, Andwerpen ende andere, ligghende met huerliederen schepe tHaerlebeke, boven gaete, omme te passeren nederwaerts, te roepen hooghe ende overluyt up de schiplieden deser voors. stede, zeer leelic ende diffamatoire ende jniurieuse woorden, onder andere: dat zij waeren stropdraghers ende moorders, jn grooter cleenichede ende jnfame van alle goede jnsetene deser stede, soo dat daerbij groote jnconvenient hadde moghen rijsen, ten hadde bij eenighe persoonen van eeren beledt gheweest, ter welcker causen ghij alhier bijden bailliu van Ghendt ghevanghen ende te rechte

(1) Zie, voor de bijzonderheden, het Memorieboek, II, 277.

[p. 196]

ghestelt zijt gheweest, als wesende zaecken van groote consequentien ende quaede exempelen, niet lijdelic zonder exemplaire pugnitie, jn spieghele van andere, hemlieden van ghelijcken te wachtene, mijne heeren schepenen vander keure der voorn. stede, naer de kennesse bij hu jn partijen ghedreghen, jnsghelijcx danof tuwen laste themlieder waerts ghecommen zijnde, condempneren hu alhier jn opene camere ghegheesselt te sijne up hu bloot lichaem totten bloede; wijsen hu voorts ghebannen te sijne twaelf jaer uuyten lande ende graefschepe van Vlaenderen up jterative gheesselinge en herbannen te sijne, ter discretie van schepenen.

Jn dit jaer, den XXIII Sporcle, waeren upde Vrijdachmaerct verberrent van herdooperie de wed^e van Willem van Luevene, schoemaeckere, die hier te vooren ooc ter zelver causen verbrant was; ende met haer wiert noch verbrant eenen David vander Leyen, ooc om de zelve zaecke; maer den scheerprechtere, ghierich zijnde, spaerde het haut, want de stadt gheeft hemlieden om zulcke justicie te doene een zeker ghetal van haute, ofte de weerde daervooren, soo dat naer dat tvier gheblust was, hij David zweyfde zijn hooft up ende nedere, zoo menich meinsche sach, zoo datter een remoer onder tvolck was; jn somma den scheerprechtere nam een groote ijseren vurcke ende stack hem duer de bust, ende ghinck boven dien hem den necke nederbuyghen ende breken, dat hem tseevere ten monde uuytliep. Sij hadden nochtans te vooren met coorden ghewoelt gheweest; maer ande vrauwe en sachmen gheen leven. Dese faulte der justicie was des scheerprechters schult, want soo gheseyt es, hij hadde te luttel hauts ghenomen ende bluste tvier ooc te tijlic, om noch tzelve haut, dat daer was, uuyt den brande te ghecrijghen, daer hij niet dan schande aen en behaelde.