Chronijcke van Ghendt

[p. 199]

XV^c LVII.

....Item dit zelve jaer, jnt leste van Meye, begonst binnen Ghendt de meeste benautheyt vanden coorne, als datmen seyde: ‘Neempt, daer es ghelt, gheeft mij coorne;’ maer niet jeghenstaende en creghen gheene, dan die zulcke fortse deden met drummen, dattet niet om segghen noch om schrijven en es; want daer en waeren maer drij mudden coorne, ende die hadden de heeren vercreghen van mijn heere van sente Pieters. Ende tsanderdaechs, wesende den eerste Junij, ghinghen de heeren omme ende segghen daer zij meenden cooren te vinden: ‘Wij bevelen hu van heere ende wet weghe, dat ghij ten aerde sult setten het zelve coorne, dat ghij meer hebt dan ghijlieden eten sult voor desen ougste.’ Daer en quam gheene, want niemant en hadde wat bij, alsoo wel buyten als binnen der stadt. Hier duere quam den grooten noot. Ende up het olieslaghers huus waeren de voorn. drij mudden ghemeten, maer met een muecken smaels, ende ooc niet meer. Daer was thuus beclommen ende daer sachmen handen vringhen ende tranen leken, ende up noch meer huusen upden Coorenaert, daer hieraf niet en es bescreven. Dit mueken rogge galt XXXII grooten.

Item alsnu upden III Junij galt een pont broot twee groote en halfven, rogghe, ende een pont taerwe broot galt drij grooten. Jae dit was noch meer, men vant gheen te coope. Dat was een benaude weke, maer binnen eenen dach ofte twee hiernaer quamen twee schepen regheleere ende twee schepen gheerste het cooren om de lieden vander stede, ende de gheerste om de lieden van buyten. Ende men verboot dat niemant cooren uuyter stede draghen en soude, maer zij mochten wel broot uuyter stede draghen; ende

[p. 200]

daer de lieden wisten dat broot jnden hoven was, soo gaven zij haer ghelt te vooren ende bleven met bevander herten voor de duere ligghen; jae mans ende vrauwen, twee ofte drij mijlen van huus. Men vraechde oock naer eerweten ende boonen, maer niemant en coester ghenouch ghevinden. Doen deden die heeren ghieten loon (looden), up elcke zijde ghedruct een G, metter croone; dese gaf men uuyte voor tschepenhuus; die een hadde, die haelde tsanderdaechs een mueken coorins, oosters goet, voor XXVI groote; maer dit en duerde maer eenen dach. Desen grooten noot en duerde maer drij weken, maer de eerste was de quaetste, want al haddemen ghelt, ghij en conste broot noch cooren ghecrijghen. Maer corts hier naer quam de vlote anghewaeyt tAmsterdam, die bedroghen hadde veel mannen, want zij langher beyde dan zijlieden meenden; want dese groote benauthede en hadde niet gheweest alle de landen duere; een yeghelic moeste doen wel trueren; jae daer was eenen man, die hadde twee broon ghehaelt, ende daer quam hem eenen man tseghen ende nam hem een van dien. Doen vraechde dien man: ‘Waerom doedi datte?’ Doen seyde hij: ‘Jc moet ooc eten; jc en hebbe gheen ghelt.’ Doen seyde dien anderen man: ‘Is dat waer, jc ben tevreden.’ Die ghebueren daerontrent hebben dit ghesien ende hebben ten besten ghesproken.

Jn dit zelve jaer, den IX Julij, zoo gaf men het taerwe broot om een groote ende een mijte tpont, veel beter dan alst zo vele galt; ende rogghen broot om XIII mijten tpont.

Up desen zelven dach passeerden duer Ghendt veertich waghens met gaut ende zelvere, die den keyser Carolus sant aen Philips, zijnen zone, om ghelt te munten.