Chronijcke van Ghendt

[p. 191]

XV^c XLI.

Jnt jaer XV^c XLI, upden beloken Paeschavont, was sente Anthuenis ghedreghen tAckerghem, diemen plocht te draghen jnde keercke van shelichs Kerst, tsente Baefs; ende des sondaechs naer de vesperen was de zelve ghedreghen ter Brugscher poorte uuyte naer Wondelghem, jn zulcker manieren alsmen placht te draghen tsente Amants beerch ende alsoo naer Oostackere.

Jn dit jaer ende schependom waeren gheexecuteert bij mijne heeren vande kuere vier persoonen, de welcke hadden ghecommitteert horribele sticken, als sommighe landtslieden bij huerlieder mannelicheyt ghehanghen hebbende ende huerlieder goet gherooft; de vrauwen huerlieder vrauwelicheyt open ghesneden ende verberrent, met meer andere execrable ende abominable sticken. Den een was levende gherabraect, den anderen onthooft ende de twee andere daernaer aen een cruysgalghe ghehanghen.

Jn dit zelve jaer, den XXI van Meye, was onthooft Bertrand Marchant; desen was uuyter stede eerst ghebannen ende ooc uuyt alle skeysers landen, alsoo hier vooren ghescreven staet.

....Jn dit zelve jaer, den XXX van Ougste, was jn sente Nicolaus keercke ghedaen de uuytfaert van Lieven Pien, ende als de vrienden gheoffert hadden, waeren bij de bidders ter offerande gheropen de vier dekens, die jnt vanghen waeren als de voorn. Lieven ghevanghen was, ende dat bij ordonnantie vanden keyser, te wetene den deken vande Mueleneers, den deken vande Huvetters, den deken vande Cleercoopers ende den deken vande Smeden.

...Jn dit zelve jaer, den XXV Novembre, up sente Cathalijnendach, quam vrau Marie, regente, binnen

[p. 192]

Ghendt, ende begheerde een begheerte, twelck haer was gheconsenteert; ende zij was binnen Ghendt tot den XV Decembre, ende daer waeren veel zaecken gheexpediert vande ghene, die met haer te doene hadde; ende daernaer vertrack zij naer Bijns.⁽¹⁾

Jn dit zelve jaer, voor Kersdach, zoo waeren binnen Ghendt ghelesen zeker mandementen vande K. Ma^t weghe nopende den rijcken ende leenhouderen, dat elc hem moeste voorsien van peerde naer huerlieder heerlichede, leenen ende goet, ende dat tusschen dit ende Maerte, up peyne vande zelve heerlichede ende goede.

Item alsnu naer Kersdach zo waeren ontboden de cnapen ende gheswoornen van elcke neeringhe, omme dat zij zouden overbringhen de regulen, rechten ende costuymen, die elck jn tsijne plochten te houdene, ende dit binnen derden daghe bij schepenen vander kuere, omme die te oversiene, want die andere ordonnantien, die overghegheven waeren, die laghen jnden. Wal, anders gheseyt sPrincen hof, onder den procureur generael, omme daeruuyt te maecken nieuwe ordonnantien vande neeringhen.

....Jn dit zelve jaer, den XXVI Maerte, wiert het heylich Sacrament ghedreghen uuyt sente Jacobshuus tot jnde capelle vanden Noot Godts, ende upden zelven dach wiert de zelve capelle ghewijt jnden name vanden H. Gheest, al bij den souvergaen vanden bisschop van Doornicke.

(1) Binche.