Chronijcke van Ghendt

XV^c XLII.

Den XXVIII Julij was binnen Ghendt ghedaen een Collatie ter begheerte vanden hove, twelc was

[p. 193]

gheconsenteert, ende upden zelven dach, jeghens tsavons, zoo quam jn Ghendt eenen zeer quaeden roup, als dat de Fransoysen ghecommen waeren ter zee ende hadden jnghenomen Axel ende Hulst, maer het was gheloghen. Ende het landtsvolck vluchte zeere met menighte van waghens ende maecten elcanderen vervaert; ende ontrent den acht hueren, upden zelven dach snavons, zo quam eenen man van buyten, zittende up eene meerie zonder toom ofte breydele, ende seyde dat de Fransoysen alle versleghen waeren, ende datter gheen zwaricheyt meer en was; maer men hielt binnen Ghendt groote wake dien nacht, ende noch twee ofte drij weken.

Item was ooc gheropen orloghe jeghens de Fransoysen ende huerlieder ghealigierde.

Item alsnu ontrent de maent van Julij worden hier jnt landt veel quade maeren ghestroyt van verraderien, dat men meest ten laste leyde Lieven Wilsens, Rutsaert van Wettere, Arent van Haute ende meer andere, welcke verraderie uuytquam duer eenen Michiel van Haute, huvettere binnen Ghendt, vadere vanden voorn. Arent van Haute. Ende tAndwerpen wierden ter dier causen ghevanghen eenen Jan van Cannengijs, die daer onthooft wiert ende eenen P^r vande Casteele, die ontquamt ende vercreech remis. Ende binnen Ghendt wiert ter dier causen ghevanghen eenen Jan van Basselaere, cnape vande neeringhe vande hautbrekers ende zijn wijfs moedere vanden voorn. Lieven Wilsens, Jan Poortier, Joos de Croocq, heer Willem vanden Eecken, canonick tsente Baefs. Ende men hielt te Ghendt ende tAndwerpen groote waecke, welcke voors. moedere van Lieven Wilsins, omme dat zij haeren zone eenen nacht ghelogiert hadde, was bij mijne heeren vanden Raede van Vlaenderen ghecondempneert ghedolfven te werdene te Mariakeercke

[p. 194]

ende Jan van Basselaere, hueren man, uuyter stede wesende als haer zone dien nacht daer logierde, was ontsleghen.

Jn dit zelve jaer, den XIII van Ougste, was binnen Andwerpen ghejustichiert desen bovenscreven Jan van Cannengijs, ballinc van Ghendt.

Jn dit zelve jaer, den XVIII Septembre, was jnt nieu casteel ghejustichiert metten zweerde eenen Jan Poortier, ende ghestelt zijn lichaem up een rat, bij sente Amantsbeerch, ende thooft up eenen staecke; ende wart binnen zekeren tijt begraven up S^te Jacobs keerchof, dit om dat hij hem te breet ghemoeyt hadde jnde voorgaende beroerte binnen Ghendt.