XVc XXXVII.
Item Gillis de Baenst, als burgmeestere vande kuere, dede prenten de copie vanden pays van Casant, waeromme die van Ghendt seer gram ende qualic te vreden waeren, ende begheerden dat men alsoo ooc prenten soude de previlegien der stede van Ghendt, ghelijcmen ghedaen hadde den voorn. pays, want daeruuyt rees groote swaricheyt daernaer....
Item jn dit zelve jaer, den XIII Octobre, verbeet den leeu, die van Thunis commen was, den man, die de leeuwen bewaerde, bij verzwijmenisse dat hij tcot niet wel toe en sloot als hijt schoon maecte, want hij hadde desen leeu, die quaet was, upde plaetse ghelaeten, ende slouch met een stocxken de leeuwinne wat uuyten weghe, die hij betraude, want sij hem wel kende; maer den leeu sloucht gaede ende quam jnt cot gheloopen ende spranck upden man ende slouch zijn groote clauwen jn zijn schauderen, hem uprechtende; den man riep deerlic om hulpe, ende claechde zeere de pijne jn zijn schouderen, maer niemant en dorfste daerontrent commen; daer was veel volcx vande buytenste traillie, anden meersch, die wierpen naer den leeu met steenen, maer ten hielp niet: den man moester blijven....
Auteursrecht onbekend