Chronijcke van Ghendt

XV^c XXXVI.

Jn dit bovenscreven jaer, den XXIIII ougste, was doot vonden bij sente Baefs brugghe, up twaetere, jn deerste waeterstraetken naest de brugghe, jn de Mortierstrate, Anth^s van Bracle, gheseyt vanden Bossche, poorter deser stede van Ghendt, ende hadde jn sijn hooft een groote wonde, maer men wiste niet, wiet hem ghedaen hadde, ende wiert van daer ghedreghen jnt huus vanden hove van sente Sebastiaen, dat doen stont jnde Appostelstraete, ende lach ghedect met zijnen keerele metter blomme.

Jn dit zelve jaer, den XX Octobre, vrijdach snachs ten elf hueren, verberrende de Vischcoopers huus, up de Vischmarct; ende daer woonde doen jnne Jacob Impens, f^s Jacobs, apoticaris; daer lach thuus eenen advocaet vanden Raede van Vlaenderen ende spranck uuyter veinstere achter up twaetere vande tweede staige, ende brack zijn beenen ende lach ende briet vande hitte, ende starf vanden spronck ten huuse van M^r Laureins Biebau, chirugien. Ende Vincent Boele liet hem van boven de bordessche vooren af vallen; die haddet ooc quaet, maer hij bequam.

Jn dit zelve jaer, den XXVII februarij, was Willem vander Blommen, gheseyt Poelgier, ghewesen te draghen een tortse tusschen twee sergeanten om een liedeken, dat hij ghemaect hadde, jn schimpe up het gheestelic; ende voorts was hem verboden niet meer te

[p. 58]

te stellen jn rethorijcken, quaet noch goet. Desen Willem Poelgier was jn grooten perijckel van zijnen lijfve, want hem gheseyt was bij schepenen dat hij sijn hooft daerom verliesen soude, waerup hij andwoorde, zegghende ‘Waerup soude jc dan mijn bonette setten?’ Maer jn summa, Jaecxken, zijn wijf, bracht hem een hemde jnt Sauselet, om jnne te steerfven, alsoo hij meende. Hij hadde ghemaect een spel van drij sotten: den advocaet, den medecijn ende tgheestelicke, ende dedet up eenen waghen ten diveersche plaetsen vertooghen, te weten dese drie ghinghen dansen ende songhen een liedeken, beghinnende aldus:

de Sotten en sijnder noch niet al
die capproenen draghen:
Zij gaen gheschoren, al waeren zij mal,
al naer ghewin zij vraghen.
Men sietse van duere te duere loopen;
dOnnoosele, die sij tvel afstroopen,
onder haerlieder schijn van deuchden;
zij crijghent al, wat baetet gherelt;
huusen, hoven ende daertoe ghelt -
daer leven zij up met vruechden, etc...

Item noch jn dit zelve jaer, ontrent den XXVII Sporcle, waeren alle factuers van rethorijcke ghejnterdiceert ende verboden gheen sticx jn rethorijcke te laeten uuytgaene sonder het consent vande schepenen, ende ooc die te werdene eerst ghevisiteert bijde Predicheeren, up correctie van schepenen.

Item alsnu jn dit schependom, jn dese maent van Sporcle, zoo waeren binnen Ghendt diveersche collatien op ghedaen, ende bijsondere eene, daer jnt jaer XV^c XXXIX daerom groote moeyte ende zwaricheyt was binnen der stede van Ghendt ende al Vlaenderen duere...