XIIIIc LXXXI.
Jn dit bovenscreven jaer van XIIIIc LXXXI, voor alder heylighendag, rees een jnconvenient tusschen deser stede van Ghendt ende den Predicheeren ofte Jacoppijnen, ter causen van een sermoen, ghedaen bij Mr Jacob Weyts, die seyde datter eenighe waeren die varieerden ofte twijfelden jn eenighe poincten vanden gheloove, waerom de heeren vande wet jn dien tijt waeren vervolghende voor den bisschop van Doornicke als datter sententie was ghegheven up den voors. Mr Jacop Weyts ende gheappelleert ende ghejnsinueert ende boven dien wart verboden met eenen trompette, dat niemant, wie hij waere, conversatie en name noch aelmoesse en dade de zelve Jacoppijnen, heymelic noch jnt openbaer, up vijant te sijne ende correctie van schepenen; ende boven dien verbodt ghedaen jeghens hemlieden te spreken nochte messe te hooren.
Item up onse Lieve Vrauwen avont jn maerte daernaer volghende was het clooster vande Jacoppijnen open ghedaen bij consente vanden heere ende wet, dwelc zij hadden doen sluyten naer het verclaers alsvooren; ende daer wierden uuyt ghehaelt ende ghevanghen ende jnt Sauselet ghesteken Mr Jan Uuten hove ende broeder Jan Mannens, religieusen van tzelve cloostere, maer wierden seer corts ontsleghen.
Item upden XXVIIen maerte was tclooster ten Predicheeren teenegaeder open ghedaen ende sij moest ten preken jn drij plaetsen, daer sij te kennen gaven dat zijlieden qualic ghepredict hadden angaende van tguent hierboven ghescreven, ende baeden den volcke dat sij met hemlieden wilden te vreden zijn dat se mesdaen hadden jeghens die van Ghendt.
Auteursrecht onbekend