|
| |
| |
| |
XIIIIc LXXXV.
Item gheduerende dit bovenscreven schependom, te wetene den VIIn Wedemaent..... wart binnen Ghendt eene waepeninghe up ghestelt bij eenighe notabele persoonen ende bij speciaele bij de vrije schiplieden, met de vleesschauwers ende andere goetwillighe ter voordernesse vanden payse; ende worden terstont ghevanghen metten heere Daneel Onredene, voorschepenen vander kuere, Jacob Heyman, ooc schepenen, ende Gillis vanden Broucke, ende corts daernaer mijn heere van Reesseghem, ende gheleet jnt sGraven steen. Ende tsanderdaechs daernaer wert de gheheele wet, metgaders alle de dekenen ende de deken vande weverie met alle zijne gheswoorne verlaeten.....
Jn dit bovenscreven jaer van XIIIIc LXXXV, jnt schependom van Jan van Vaernewijc, heere van Bost, den IXn jn Wedemaent, waeren ghehaelt ende ghevanghen te Aelst Willem Rijm ende Jan van Coppenholle.
Item ten zelven tijden waeren ooc ghevanghen te Ghendt Justaes Schietcatte, overdeken was jnt voorleden jaer van LXXXIIII, Pieter van Hauwaert schepenen was, Jan de Crane, Mr Jan vanden Broucke, Jan Rufelaert.
Item up den XIIII Wedemaent waeren verwijst Willem Rijm ende den voorseyden Daneel Onredene ende gheexecuteert up een schavaut up de maerct, present den ghemeenen volcke jnde wapen staende.
Jtem alsnu up den XVIn Wedemaent vonden hemlieden mijnheere van Beveren ende Mr Rijckaert Uuyten hove omme te vindene alle middele van payse, achtervolghende welcken ghecoren waeren drije notabel heeren, te weten mijn heere van Ste Pieters, Mr Pauwels de Baenst, president, ende mher Adriaen van Raveschoot, omme te treckene bijden hertoghe van Oostenrijcke omme te tracteren van payse.
| |
| |
Item alsnu den XVIIn Wedemaent wart groote beroerte bij nachte up de maerct onder tvolc bij toedoene van eenen Adriaen van Thielt, jae zoo groot ende zulc gheschil om elcanderen up te smijtene, zo verre dat alle de ghevanghenen moesten ontsleghen ende ter maerct brocht zijn, nochtans dat zij er vooren ghevanghen waeren ende te rechte ghestelt uuyt laste vande ghemeente. Ende wart doen gheordonneert dat niemant meer dan een jaer officie hebben en soude, ende zes jaer wepelen, ende dat ghedaen, terstont trocken (sij) vande maerct.
Ende tsanderdaechs up den XVIIIn trocken de voors. notabele heeren bij den hertoghe van Oostenrijcke om pays te maecken, de welcke wel ontfanghen waeren; ende binnen middelen tijde up den XXII in Wedemaent vant hem de voors. binnen Brugghe, ende daer wart tbestant ghemaeckt van twaelf daghen ende daer waert den heere van Gruythuuse ghevanghen met meer andere.
Item up onse Vrauwen dach jn hoymaent jnt voors. schependom was te Ghendt den pays ghepublyeert ende uuytgheropen tusschen den voors. hertoghe van Oostenrijcke ende den lande van Vlaenderen. Ende den VII Hoymaent quam de voorn. hertoghe van Oostenrijcke binnen Ghendt met groote macht van edelen ende andere volc van wapenen, te peerde ende te voete. Ende des ander daechs track de voors. hertoghe met sijnen sone Philips naer Ste Pieters, tSente Jans ende daernaer up toochuus, up de Vrijdagmaerct, ende bezwoer jn alle drije de plaetsen princelick voocht, regent, mamboir ende gouvernuer te sijne slandts van Vlaenderen, tot dat hertoghe Philips zijnen zone commen zijn soude ter rechter aude. Ende jnsghelijcx wart hem daer trauwe ende hulde ghesworen vande wet ende den ghemeente vander stede, midts welcken den pays aldaer claerlic uuytghelesen was jnt langhe ende ghespecifiert de persoonen, die buyten den payse waeren, te wetene
| |
| |
de heere van Rammont, de heere van Gruuthuuse ende mijn heere vande Vere, alle drije vanden ordene vanden toysoene d'or; ende daernaer zes persoonen van Ghendt, te weten Laureins van Massemene, Jacop ende Jaspar Heyman, Jan van Coppenholle, Gillis vanden Broucke ende Justaes Schietcatte ende meer andere van Brugghe ende IJpre, tot achte. Item ende terstont wart Mathijs Peaert ontboden up tvoors. toochuus bij den voorn. hertoghe van Oostenrijcke, ende omme dat de zelve Matthijs die cause ende oorspronck gheweest hadde, metgaders de vrije schiplieden van Ghendt, vande wapeninghe, uuyter welcker den pays toequam, wart aldaer de voorn. Matthijs rudder ghesleghen bijder handt vanden voors. hertoghe van Oostenrijcke ende met dien hinck hij hem Matthijs anden hals een costelicke gauden ketene.
Item alsnu up den XIn Hoymaent rees binnen Ghendt een felle wapeninghe bij toedoene van sommighe quaetwillighe vander zelver stede, die trocken ter maerct zonder cause ofte redene, met bannieren ende met engienen, sonder van daer te willen vertrecken jn eenigher manieren; maer dat meer was, trocken voort tot up Ste Pharahilde plaetse met opene banieren ende engienen, schietende te Walle waert, daer de voorn. hertoghe van Oostenrijcke ende Philips sijn sone jnne was, huerl. natuerlicken prince ende heere, boven den payse ende eede, bij hemlieden te vooren ter maerct ghedaen; nochtans en hadde ghedaen de groote deucht ende compassie vanden voorn. hertoghe van Oostenrijcke, die daer ter maerct oft up de plaetse waeren, souden daer alle ghebleven hebben ende de stede ghepilgiert ende jn vreese verberrent te sijne. Ende terstont siende de groote macht vanden prince, trocken snuchtens tijlic elck zijns, zo zij best consten, ende met groote vaere, omme welcke voors. wapeninghe waerender zeven
| |
| |
verwijst ter doot, met eenen vonnesse, te wetene Jan Goethals, Ghijselbrecht Aelterman, Vincent de Ruddere, Willem de Boo, Olivier Oste, Lossche Loy ende Lieven Deynoot, fs Victoirs.
Item alsnu upden XII Hoymaent vertrack hertoghe Philips uuyt Ghendt ende wart gheconvoyeert vanden hertoghe van Oostenrijcke, zijnen vadere, tot buyten poorten ende voort tot Dendermonde met veel edelen ende volc van wapenen.
Item jn Julio wart binnen Ghendt een collatie vergaedert omme up te doene de doliancie vanden hertoghe van Oostenrijcke vanden faicte ende wapeninghe, gheschiet op de Veerle plaetse jeghens den pays ende hoocheyt vanden hertoghe ende sijnen sone; ende gaf over al tguent dat hij was begheerende jn beteringhe, naer tverclaers vanden capittele, dies ghewaghende; jnt welcke de drij leden van deser stede consenteerden, biddende om eenighe artijckelen gheroyeert thebben, die hemlieden gheconsenteert waeren uuyt speciaelen gratie. Ende ten zelven daghe waeren omme de zelve commotie ende faict onthooft Anthonis van Nieuwenhuus, ende ten voornoemden daghe ghebannen dese naervolghende persoonen, elc vijftich jaer uuyt Vlaenderen, te weten Lieven Brixis, Michiel de Keersmaeckere, Jacob de Wilde, hautbrekere, Boudijn van Rosiere, Mr Jan vanden Broucke, Boudijn de Smet, fs Boudijns, Jan Lachemoen, Joos vander Schuere, Jacob Heyman, Jan Brouckaert, Loy de Baen, Anth. Colpaert, Jan Neerinc (jn den Hoyaert), Lieven de Moor, Marten vanden Bundere, Paesschier Minnaert, Jan de Bru, Lieven Steppinc, Pieter Rommelien, Mattheus van Loo, Gillis de Buc (de jonghe), Hendric van Belle, Pauwels dHamere, Lieven dHamere, Pieter Clyncke, scrijnweerckere, Laureins de Coc, Jan Maes ofte Meskin, Jan Spilioen, Lieven van Praet, backere, Jan van
| |
| |
Roome, keersmaeckere, Jan Vlaminc, te Spriete, Symoen vander Clijnghen, Gillis vanden Eede, schoemaeckere, Jan de Commere, smet, Joos vander Haghe, Joos van Lambrugghe, Hanneken vander Gracht, Pieter Cosijn, Lieven Hauwe.
...Item up den XXIX der zelver maent waeren dese naervolghende persoonen ghebannen, elc vijftich jaer, ter causen alsvooren, te weten Jacob de Beer, Anth. Billau, Jan Billau, Lieven de Meyere, causmaeker, Jan Baers, Jan de Munc, schoemaecker, Vincent vanden Wijngaerde, Lieven Ghijselins, Jan vander Dijcstadt, Jan de Crane, dhaude, Hendric de Vleesschauwer, Gillis Rogiers, Joos de Brune, Zegher vande Velde, Everaert Spaercke, Joos Billau, Jacop dHamere, Jan de Peystere, up tSant, Jan Uuyter Meere, Jan de Witte, Gheeraert vanden Plassche, Joost vanden Haute, Marten Lijnezone, Jan Moens, Jan Coolins, Jan Valcke, Lieven Beyaert, Jan Pieters, turfdraghere, Joos vanden Bossche, Lieven van Hersele.
|
|
Auteursrecht onbekend