Chronijcke van Ghendt

XIV^c LXXVI.

...Jn dit jaer van LXXVI rees binnen Ghendt groote zwaricheyt ter causen van zeker acte van verbande om te weten wijen datse waeren, die de zelve acte van verbande vercreghen hadde zonder wete vande ghemeente, waeromme de ghemeene dekens vande LIII neeringhen, metgaeders schepenen van beede de bancken ende beede de hueverdekenen, die alsdoen dienden, vergaedert waeren up den Collatie soldere tot ter tijt dat men bevonden hadde dat jnt jaer LXVIII, doen Roelandt van Wedergrate, m^r Philips Sersanders ende Olivier de Grave dienden als schepenen vander kuere, doen de zelve acte

[p. 35]

van verbande, boven ghenomt, ghemaect was bij hemlieden ende huerl. medeghesellen, omme twelcke de zelve drij persoonen ghevanghen waeren. Ende dese acte van verbande hielt jnne ende sprack dat, zo wije hij waere, die eenighe waepeninghe maecte binnen deser stede van Ghendt ende ghevanghen worde, die soude verbueren zijn lijf ende goet; ende de kinderen, die achter hemlieden bleven, die souden verliesen het goet dat hemlieden verstorfven waere van huerlieder vadere. Ende voort soo soude den heere dat zelve goet andveerden als zijn propre goet; bet voort soo souden de kinderen van zulcken persoone verbueren ende verliesen teeuwighen daghe ende alle die naermaels gheboren souden werden huerlieder neeringhen ende vrijheyt van dien, daer heurlieder vadere ter causen voorscreven omme ghestorfven waere. Ende voorts zo hielt de zelve acte noch jnne, dat zo wije yemant wiste, die uuyt waere om eenighe beroerte ofte wapeninghe te maecken ende sij dat verzweghen ende niet te kennen en gaven den heere ofte der wet, die soude zijn gherecht metten zweerde, jndien dat mense ghecrijghen conste, ende huerlieder kinderen staende jnt zelve jn alder manieren, ghelijc de kinderen staende dies vadere de wapeninghe ofte beroerte ghemaect hadde ofte helpen maecken, dwelc gheheel ende al was contrarie der previlegien deser stede; want het previlegie zecht ende verclaerst, dat gheen poortere van Ghendt niet meer verbueren en mach dan tlijf ende tzestich ponden parisis. Ende binnen den zelven avonde, naer dat de zelve persoonen hier vooren verhaelt, ghevanghen waeren des smorghens up den soldere, soo was ghevanghen Pieter Huerebloc ende hij was gheworden heere vanden Raede jn Vlaenderen. tSanderdaechs daernaer worden ghevanghen Jan Poucke, Jan vande Poele, temmerman, ende M^r Pieter Baudens. Ende binnen thien ofte twaelf daghen daernaer

[p. 36]

jnde weke van half vastenen zoo waerender drije onthooft: des donderdaechs Pieter Huerebloc, des vrijdaechs M^r Pieter Baudens, des saterdaechs Jan van Poucke. De cause was, waerom dat sij storfven, om dat zij binnen der tijt dat zij tregiment vande stede ghehadt hadden langhen menighen tijt, dat sij ghegheven hadden groote sommen van penninghen vander stede goede aen diveersche heeren om altijt ten coste vande stede te blijfven jnt regiment, welc goed ende ghelt sij ghegheven hadden sonder wete ofte consent vande ghemeente deser stede. Ende hadden boven dien vercocht vele diveersche renten jn haerliederen tijt ten laste vander stede, ende het ghelt daeraf ghestolen ende ghenomen tot huerlieder proffijcte, welcke zaecken zij ghedaen hadden contrarie der costuyme ende previlegien vande stede, want de regierders niet en vermoghen te ghevene noch te belastene sonder de wete ofte consente vande ghemeente ende den drij leden deser stede, daerom dat se onthooft waeren up een schavout voor sgraven steen, up de Veerleplaetse, ende daernaer begraven elc naer zijnen staet. Ende dat het goet, dat zij bij alzulcken middele der stede ghestolen hadde, dat moesten de kinderen ofte de hoirs der stede weder gheven ende restitueren....

....Item des maendaechs jnde goede weke zo quam vrau Marie de graefnedinne van Vlaenderen bidden die van Ghendt voor de voorn. heeren (den canselier ende den grave van Himbrecourt ende mijn heere den protonotaire, verbeyder van tbisschopdom van Terruwaen) die ghevanghen laghen; ende doen was huer gheseyt dat sij besworen hadden recht te doene alsoo wel over den rijcken als den aermen. Ende doen waeren gheordonneert van mijnder vrauwen weghe metter wet van Ghendt acht edele heeren omme metter wet van Ghendt te hooren huerlieder examen ende verlijt, dat zij verlijden zouden. Ende up den

[p. 37]

witten donderdach des smorghens waeren dese acht voorn. heeren ende schepenen van beede de bancken ende de dekenen jnden Wal ofte princen hof, bij mijnder vrauwe de graefnedinne, ende gaven haer te kennen tverlijt van Hugonet den canselier, hoe dat hij verkendt hadde dat hij de briefven onthouden ende verdonckert hadde, die hertoghe Caerle daer voor Nanchy tot zijnder dochtere ghescreven hadde angaende den ghebreke des leghers, ende andere zaecken, ter oorloghe dienende, jnde welcke ghescreven stont dat ten waere dat men hem victuailge tot sijnen legher sonde, sou soudt gans met hem ende met zijnen volcke ghedaen zijn; ende voorts gaven zij ooc te kennen het verlijt vanden grave van Jmbrecourt. Ende up desen zelven dach voor den noene waeren zij beede ghehaelt uuyt het Graven casteel ende alsoo ghebrocht jnde vierschare vande kuere, daer datse beede verwijst waeren ter doot. Ende upden zelven voornoene was mher Jan van Melle, ruddere, ghebrocht ter vierschaere ende wert ooc verwijst omme dat hij vele diveersche heeren hadde ghegheven vander stede goede, zonder consent vande drij leden vander stede van Ghendt; ende dat hij zelve groot goet ghestolen hadde, sijnde jnden dienst vande stede, te weten upper ontfanghere vande stede. Ende de zelve Jan van Melle was ghehaelt bij de Witte Crappoenen jnde stede van Dendermonde. Ende dese drije aldus verwijst zijnde, soo waeren zij naer den noene ghebrocht up de Vrijdachmaert up een schavout, present de neeringhen, die daer jnde waepen stonden⁽¹⁾.

(1) Het overige nagenoeg als in het Memorieboek van Gent.