Den lvst-hof van de christelicke zielen

I V. Sij wederleght de God's lasteringhen.

DAn wien hoore ick daer braecken; Dat mijnen beminden eene stervelicke Maeghet aenbiddet ? O du Boose God's lasteraer, Du onaerdigh swijn; Du stijnckenden bock; du hebst het valschelick ende godelooselick gheloghen !

Van hier, O ver van hier, Kerck-dieven godeloos;
Die onse cruyden pluckt, om u ghedachten boos
Te voeden, en den Heer te last'ren in zijn leden !
Neemt een gheknoopte sweep, en drijft dien Hondt uyt Eden.

O Nijdt du bist eene quaede beeste ! als du eens in des menschen ghemoedt commest, soo magh hij wel voor den val surghen !

[p. 133]

Ghelijck de vlieghe den stercken Leeuw in den neuse vlieghet, ende hem sinneloos door bergh ende dal doet loopen; Soo heerschet de Nijdt over de Hooghmoedighe menschen, die Gode sijne Eere benijden: Want noyt en schreven wij ons selven eere buyten Christo toe. Maer, du Heere Iesv, bist eenen hert-kender, Richter, ende gantsch strenghen straffer der ghener die dijne eere willen bevlecken: Stae voor dijne eere ende voor de onse ! Amen.