Versamelde gedigte

[p. 120]

Met 'n mandjie rose

Liefste Tannie, ons bring rosies,
Rosies blink met môredou,
Mooie kleurtjies, soete geurtjies,
En dis alles net vir jou!

Rosies fluister: ‘Liefde, soentjies’ -
In verbloemde blommetaal;
Rosies wat ons uit ons tuintjie,
Liefde uit ons hartjies haal.

Maar die soentjies ... in geen mandjie,
Nêrens in wil dit geluk -
Liefste Tannie, ons is raad-op -
Soentjies moet jy self maar pluk!