't Ronde jaer, of den schat der geestelijcke lofsangen
(1660)–Christianus Vermeulen–
AuteursrechtvrijStemme: Engelsche fortuyn.1. ALs 't hert de lust in alles heeft volbracht
Na will' en wensch geleeft in weelde sacht;
Als geltsucht heeft veel schadt by een vergaert,
Wat ist geweest? een hemel op der Aerdt.
2. Sie doch eens aen het leven van die geen,
Die rijck en trots hier op der aerden treen,
Die op het goet, en op dit aertsche stof
| |
[pagina 195]
| |
Voen all' haer hoop, en voeren al haer lof.
3. Sie eens die mensch, die met gewelt en macht,
Naer het gebiedt van all' de weerelt tracht:
Sie eens die mensch die all' sijn wille heeft,
En naer sijn lust in vreucht, in weelde leeft.
4. Sie hier den mensch, die nydicheyt en wraeck,
Dient met het hert om een geringe saeck:
Sie hier den mensch, die altijt twist of pleyd,
't Sy recht of niet, noyt van sijn onrecht scheydt.
5. Sie hier de mensch, die vaek een vroom gemoet,
(Gelijck onvroom) on-eer en schand aendoet,
Met boeye-plaegh, en diergelijcke straf,
Die 't weerelts recht aen sijne machten gaf.
6. Sie hier dat hert, dat staech in weelde leeft,
Sie hier den vreck, die laraw niet geeft:
Sie hier de geen, die in de overdaedt,
Sijn snoode lust en gulsicheyt versaedt.
7. Sie hier den mensche in geyle lust verblindt,
Sie hier dat hert dat 't ander vleesch bemindt:
Sie hier de mensch, die soo sijn tijt besteet,
Dat hy in lust sijn Heer en Godt vergeet.
8. Sie hier, ô mensch! sie hier, eylaes! een tijt,
Die 't sondich hert maeckt al sijn lusten quijt:
Die staet, en pracht, die rijckdom, gelt en goet,
Gewelt, en recht ten eynde komen doet.
9. Sie hier, ô mensch, sie hier, hier is de doodt,
Die all' u lust nu met de voeten stoot:
En die het eynd van all' u lusten is,
En voert u ziel in helsche duysternis.
|
|