't Ronde jaer, of den schat der geestelijcke lofsangen

Den 18. Sondagh naer Pinxteren.

Stemme: Blijtschap van mijn vliet.

1.
ALs Iesus sich verstack,
En voer te zijner stede,
Daelt daer van 'thooghe dack
Een gichtich man benede;
Een die in groote pijn
In krenckt langh hadd' ghelegen,
Een Mensch, die ('twou so zijn/)
Niet een lidt kon bewegen:

Van wien als Iesus goet

Zijn groot gheloof met spoet

Hadde bevonden, sprack terstont;

O soon, hebt goet betrouwen,

'Tsal nu, noch nimmer rouwen,

Ick vergeef' u all' u sondt.

2.
Maer 't Phariseesch gebroedt
Van Abrams zaedt verbastert,
Sprack niet, als gall' en roet,
Hoort, dese man, die lastert:
Twelck Jesus door zijn kracht
Siende, sprack tot de troepen:
Wel hoe! dus dwers ghedacht?
Wel hoe, dus boos gheroepen?

[p. 90]

 

Wat is doch eer gheseydt,

 

Met goet en soet bescheyt,

 

Ick schell' u quijt all' u misdaet;

 

Of weest terstont ghenesen,

 

Kloeck, en fris opgheresen,

 

Gaet, gebruyct des Heeren straet.

 

 

 

3.

 

Maer om te sien de grondt:

 

Weet dat den Soon des menschen,

 

Vergheven kan de sondt,

 

Van woorden, wercken, wenschen:

 

Dat niet alleen, als Godt,

 

Maer oock als mensch geboren,

 

Dits' mijn, dits' zijn gebodt,

 

Wilt doch niet gaen verloren

 

Nu ghy dan onvertsaecht,

 

Gaet, en u bedd' mee-draecht,

 

Dits mijn wil, dat moet so gaen,

 

Loop gichtich man, wilt u spoeyen

 

Loop, wilt de sond' verfoeyen,

 

Die u de sieckt heeft aengedaen.

 

 

 

4.

 

O Jesu, kompt doch strack

 

Hier in dit krancke leven,

 

Tot u alleen ick snack,

 

Ach! wilt doch gratie gheven:

 

Op dat ick kennen mach

 

Wt mijn sieckte, mijn sonden,

 

Dat ick met meer ontsach

 

U vrees' tot aller stonden:

 

Foey, hoe vuyl moeten zijn

 

Alle de boosheden mijn,

 

Onse sonden voor Godt den Heer?

 

Daerom hy so veelderhande

 

Hier, ende in alle lande

 

Plagen send, hoe langer, hoe meer.

 

 

[p. 91]

 

5.

 

Maeckt dan u eve mensch

 

Tot Godt door liefde te trecken,

 

Want de sonden naer wensch

 

Moetmen door liefde decken,

 

Leert doch met goet beleydt

 

Van Christus, u behoeder,

 

Altijt meedoghentheydt

 

Aen uwen naesten broeder:

 

Bewaert u hert doch wel,

 

En draecht u bedd' doch snel

 

Op welbehagen van den Heer,

 

Dat ghy wel eer met smerten,

 

Naar s'vleeschs, en 'swerelts wetten

 

Hebt ghedraghen buyten leer.