't Ronde jaer, of den schat der geestelijcke lofsangen
(1644)–Christianus Vermeulen–
Auteursrechtvrij
[pagina 9]
| |
Stemme: In een Prieeel van Bloemen.1.
WEl / wat zijn dit voor wercken?
Dat hier St. Jan Baptist,
Sendt van syn beste Klercken,
Te vraghen naer Iesus Christ:
Zijt ghy die eens sult komen
Om Israel te vromen?
Of zijn wy gantsch vermist?
Zijt ghy &c.
2.
Seght 't gheen u is ghebleecken
Dat veele blinden sien,
Dat stomme tonghen spreecken,
Dat loopen kreup'le Lien;
De doode, de doove, melaetsche,
Verheughen sich t'aller plaetse,
Wie kan't u klaerder bedien?
De doode &c.
3.
Maer seght doch eens ghy Vrienden,
Komt gh' om te kijcken een Riedt
Verwaeyt met alle Winden?
Loop, loop, ten is hier niet:
Of soeckt gh'een sachte Joncker?
Of een Propheet in 't doncker?
't Is anders sooje siet.
Of soeckt &c.
| |
[pagina 10]
| |
4.
Neen, soeckt hem in de Boeyen,
Daer leydt hy nae syn wensch,
Wilt u doch wel besnoeyen,
O yle, broose mensch!
Weest bly op Godts behaghen,
Als ghy vervolgingh moet draghen,
O ziel! dit zy u wensch.
weest bly &c.
|
|