Logo DBNL
Spiegel historiael. Voortzetting vierde partie [alleen brontekst] (1998)

Spiegel historiael. Voortzetting vierde partie [alleen brontekst]

(1998)–Lodewijk van Velthem–rechtenstatus Auteursrechtelijk beschermd

Vorige Volgende

[Fragment 1]

 
+Van den paus Innocent,
 
.xij. abden van ordine gereet,
 
Die men cesteaus nu heet,
 
Mit enen legate van Rome;
5
Ende elc predicte ende gome
 
Van Albigensen in dat lant
 
Ende bringhen ter kerstine hant,
 
Dat si daden so datter bisscoppe mede
 
Ende pape ende clerke ter stede
10
Worden gheset ende daer ontfaen.
 
Sinte Dominicus, sonder waen,
 
Was in dat lant oec bekent
 
Ende van daer an prediken sent,
 
Als ghi hier na wel sult verstaen,
15
Hoe hi began die doghet saen.

Van Sinte Dominicus .lxv.

 
Sinte Dominicus, als wijt horen,
 
Was wt Hyspanien geboren,
 
Ute enen dorpe heet Calaroga.
 
Een sijn petrijn oec daerna,
5
Diene hief uter vonten daer,
 
Doe hi ionc was, droemde haer
 
Dat hi een sterre hadde vor thooft
 
Die claerre sceen, des gelooft,
 
So dat haer dochte dat al tlant
10
Daer of verlichte alte hant
 
Doe hi was een luttel out,
 
Ter scholen setti sijn gewout
 
Ende leerde so wel ende neernstelike,
 
Dat hi wort van sinne so rike,
15
Van alre sciensien, van alre aert,
 
Ende van doechden so vermaert,
 
Dat sijns ghelijc niene was.
 
Dese mare liep doe na das
 
In Hyspanien harde groot
20
Van sire doghet die hi doet;
 
Want sine boeke vercochti mede
 
Ende gafse te menigher stede.
 
Menighen groten riken man
 
Bekeerdi namaels, ende wort dan
25
Sijn geselle in armoeden groot.
 
In vasten, in beden, in odmoet,
 
Was hi altoos, nacht ende dach.
 
Doe van Oxomensen (sic) sach
 
Sijn goede leven, vercoos hine daer
30
Ende maecten canonic regulaer,
 
Daer hi onder die canoniken saen
 
Groten name heeft ontfaen.
 
Een boec haddi, daer hi in las
 
Wat der herten zuverheit was
35
Ende van godliken leven mede;
 
Ende als hi dan begonste gerede
 
Te pensen om al dese saken
 
Ende sijn herte niet conde volmaken
 
Al sijn ghepens in godlicheden,
40
Hier om heefti dickent leden
 
Grote pine, want hijt al
 
Wilde begripen, groot ende smal,
 
In sijn herte die gracie Ons Heren;
 
Ende dat hem dies yet soude ontkeren,
45
Was sere ieghen sinen wille.
 
Selden lach hi erghent stille,
 
Hine bede altoos mitten monde;
 
Ende als hi was teniger stonde,
 
Daert hem yet wort benomen,
50
So wildijt mitter herten volcomen.

Van sinen goeden leven .lxvi.

 
Van Castele coninc Adelfonsus
 
Bat Dicatuse, den biscop, aldus
 
Dat hi voer tot Marchyas
 
Mit sinen zone ende provede das
5
Of hi een huwelijc na tgone
 
Tusschen sire dochter ende sinen zone
 
Mochte gemaken; ende dit dede
 
Die bisscop, ende nam aldaer ter stede
 
+Mit hem Dominicus nu saen.
10
Ende doe si quamen, sonder waen,
 
Tot Tholusen in die stat,
 
Daer si snachts lagen na dat.
 
Haer wert was een quaet man,
 
Een ketter, een ongelovich tyran,
15
Ende Sinte Dominicus ghinc hem ane
 
Ende dedem van den gelove te verstane
 
Ende predicten ende seide menich wort,
 
Dat die ghene wort becort
 
Van sire quaetheit ende quamer af
20
Ende Gode ene goede ziele gaf.
 
Oec, doe hi in Abuensen ghinc,
 
Ende predicte, gesciede dese dinc,
 
Daer hi om tghelove dicke aldaer
 
Moeste disputieren vorwaer
25
Jegen ketters, iegen buggerien,
 
Jegen baeliuwe, onreyne quadien,
 
Ende ieghen meesters en de iegen joden,
 
Ende ieghen alle onreyne roden
 
Die iegen Gods gebode daden;
30
Daer ieghen was hi vroe ende spade
 
So dat si daer na worden te rade,
 
Dese onwettich entie quade,
 
Ende visierden dat si vorwaer
 
Hare wet wilden bringen aldaer
35
In een boec al bescreven,
 
Ende hi soude bringhen daer neven
 
Sijn boec, dat hi selve screef,
 
Ende daer hi grote bliscap in dreef,
 
Ende men soude maken .j. vier
40
Entie boeken leggen hier
 
Int vier, ende dan dat daer verbrant
 
Sine wet wert of gescant.
 
Dit wert gedaen na dese tale,
 
Ende haer boec verbrande altemale,
45
Ende Dominicus bleef ongescent.
 
Noch wert dit gedaen sent
 
Ende tboec spranc daer uten viere
 
Ende ... daer na sciere
 
So quam dat boec ongescant
50
Uten viere onverbrant.
 
Om dit ende om ander dingen,
 
Die hem gescieden sonderlingen.
 
So bekeerdi vele liede,
 
Die quamen te Gods meysniede.

Van Sinte Fransiscus. lxvij.

 
In desen tiden was Sinte Fransiscus,
 
Daer wi oec of lesen dus,
 
Dat hi eerst werf fondeerde gereet
 
Der minder broeder, God weet.
5
In sijnre ioncheit was hi goet
 
Ende in sine oude wies hem die moet
 
So sere in dogeden, dat hem die man
 
Niet te sere geprisen en can.
 
Sijn vader was rike sere van goede,
10
Ende was hem sere iegen den moede,
 
Dat hem die zone dus bekeerde
 
Gode te dienen; ende dat hi leerde,
 
Dat was den vader oec verholen;
 
Ende dat hi ghinc ter scolen
15
En wist die vader niet en (sic) twint.
 
Namaels so gesciede oec sint
 
Datten die vader vinc daer naer
 
Om tleven dat hi lede daer
 
Ende sloten in een kerker saen,
20
Daer en die moeder wt heeft gedaen,
 
Dies die vader erre was,
 
Ende versprac die moeder om das
 
Al dat hi genemen conde
 
Gaf hi doer Gode op die stonde.
25
Sijns selfs cleder gaf hi mede
 
Den lieden te decken hare lede;
 
In alle manieren waer hi can
 
Stont hi den armen bi vort an.
 
+Mit enen roc ende bervoet mede,
30
Ghinc hi van stede te stede.
 
Ter lasarien is hi oec gegaen
 
Ende daer hare voete dwaen
 
Ende diende hem odmoedelike;
 
Daer na hordi als dier gelike
35
Die misse singhen tere stont
 
Daer hem die ewangelie wert cont
 
Dat ons heren iongeren ghingen
 
Ende niet mede en souden bringen
 
Daer hise prediken sende ter stat,
40
Gout no silver gaf na dat,
 
No sac no roede, no oec broot
 
Souden si draghen te gere noot;
 
No oec twe rocke, no oec scoen
 
Souden si oec an doen.
45
Dus nam hi an enen roc
 
Ende warp wech roede ende stoc;
 
Ende doe hi dus dit al verstoet
 
Was hi blide in sinen moet
 
Ende seide: dit beghere ic allene.
50
Mit al sire herten ende na tghene
 
Dedi van hem roc ende scoen,
 
Ende wilde oec also doen,
 
Ende gorde hem mit enen zele boven.
 
Ende om dat hi hoorde Onsen Here loven
55
Sinen iongers ende seggen mede:
 
‘God gheve u sinen vrede,’
 
So plach hijt selve altoos vort an.
 
Daer hi predicte sprac hi dan,
 
Int eerste: ‘vrede si onder u; gehort!’
60
Ende dan sprac hi sijn sermoen vort.

Hoe Sinte Fransiscus sijn orde eerst maecte. lxviij.

 
Om sine goede exempelen saen,
 
Dier hi vele nu heeft gedaen,
 
So volchden hem vele liede,
 
Ende som lieden si alle miede.
5
Ende hebben sijn abijt ontfaen
 
Ende volchden hem na sonder waen
 
So ... hi doe ge...
 
Die sine voetstappen volgeden na.
 
Op enen dach sat hi onder hen,
10
Ende hem quam daer in sinen sen
 
Dat hi Gode dancte das
 
Van al dat hem gegeven was;
 
Daer na pensedi weder saen
 
Dat hi luttel hadde gedaen
15
Voer Gode, ende sinen tijt oec mede
 
Niet wel en heeft besteet gerede;
 
Ende hier om wort hi bevende daer;
 
Ende hier om, op die ure daer naer,
 
Wort hi op gevort ter tide
20
Daer hi in wort so sere blide,
 
Dat hi in hem selven gebrac.
 
Hier na hi tsinen gesellen sprac
 
‘Wi moeten ons sceiden hier nu
 
‘Ende in andren lande, segic u,
25
‘Prediken elc sonderlinghe.’
 
Ende aldus scieden die dinghe.
 
Ende doe si daer hadden gewesen
 
Een stic van henen, doe bat na desen
 
Fransiscus Onsen Here saen;
30
Want hem langde sonder waen
 
Na sinen gesellen, dat segic u,
 
Dat hise mochte vergadren nu.
 
Ende Onse Here dede na dat,
 
Dat si vergaderden op een stat
35
Daer elc andren vertelde saen
 
Wat God doer hem heeft gedaen.
 
Daer na schreef hi enen boec,
 
Daer hi om dede ondersoec
 
Dat hi ene ordine soude maken
40
Na sijn leven, na sine saken,
 
Ende doe haddi .xi. gesellen.
 
+Ende dit woudi den paeus gaen tellen.
 
Met .ij. gesellen is hi comen
 
Totten paeus der stat van Romen
45
Om hare regele te doene confirmeren.
 
Innocencius ontfincken mit eren,
 
Die doe paus was, God weet,
 
Ende confirmeerde sijn regele ghereet
 
Ende orlofde hem daer na zaen
50
Dat si prediken souden gaen.
 
Met bliscapene is hi danen gekeert
 
Ende hevet tfolc onder wegen geleert.
 
Ende dit hadde grote wonderlichede,
 
In steden ende in dorpen mede,
55
Gheleerden lieden, want si niet
 
En wisten dat hi ter scholen ghinc yet.
 
Daer om wonders hem ter mere,
 
Dat hi van Gode sprac diepe sere.
 
.iij. ordine maecti, segic u.
60
In dene bleef hi selve nu;
 
Dander was van goeden vrouwen,
 
Die sine ordine oec ane scouwen;
 
Terde was van diere manieren,
 
Dat die ander ordine hantieren.

Van dinghen die ghescieden. lxix.

 
Doe men screef m. cc. mede
 
Ende .vij., wel gherede,
 
Doe voer Philips van Vrancrike
 
In Aquitaengen des gelike
5
Ende struwerde die lande daer,
 
Ende nam op oec daer naer
 
Dorpe, castele ende porten mede.
 
Oec wert gesent van Rome der stede
 
Een legaet, die den coninc
10
Dat hi verstorde weder die dinc,
 
Die hi daer voren hadde gedaen
 
An papen, an bisscopen sonder waen,
 
Ende hise weder ontfinge daer ...
 
Die bi hem verdreven waren.
15
Ende zwaerlike sijn doe comen
 
Ende hise weder heeft genomen
 
In sinte Nyclaeus ...
 
So waren grote ...
 
Ende daer na viel een reghen groot,
20
Die scade dede sonder genoot,
 
Ende blixme wort daer mede gesien,
 
Die menigen vervaerde van dien.
 
So worden huse verbrant vele
 
Ende grote gestichte ende castele.
25
Int selve iaer Satellia die stede
 
Wort verwonnen nu gerede
 
Van den heydene mit pinen groot,
 
Daer der onser vele bleef doot.
 
Int ander iaer een pales grave,
30
Daer men aldus scrivet ave,
 
Dat hare sprake hiet Landegrana,
 
Philippe die keyser dode hier na,
 
Wies wijfs dochter was
 
Des keysers van Grieken, die na das
35
Van rouwen starf, doe sijt wiste.
 
Doe quam Otte daer na mit liste
 
Des hertogen zone van Sassen
 
Ende wilde hem te keyser passen.
 
Over mits Innocente gereet
40
Die paus, die hem te helpere steet,
 
Peter van den niewen castele,
 
Monic ende legaet in enen dele,
 
Wort van den paus gesent saen
 
Tot den grave van Tholusaen,
45
Dat hine verbanne; mar (sic) di grave
 
Gheboot genoech te doene daer ave.
 
Nochtan en haddijs ghenen wille,
 
Maer wilden doen doden al stille.
 
Ende doe die legaet sciet van daer,
50
Twe sgraven knapen volgeden naer
 
Ende laghen snachts daer hi lach;
 
+Ende smorghens alst was dach,
 
Voer Peter wech, die knapen mede,
 
Ende daer hi scepen soude gerede,
55
Stacken deen mit enen spere
 
In sijn side mit groten ghere,
 
So dat hi daer of bleef doot saen.
 
Doe dedi dit woort verstaen
 
Eer hi starf: ‘die di gesent
60
Hier hevet ende mi gescent,
 
Hi hevet di vergeven al,
 
Ende ic vergheeft groot ende smal.’
 
Die bisscop va Parijs
 
Starf oec in deser wijs,
65
Ende Peter van Tors, die tresorier,
 
Wort nu bisscop gemaect hier.

Van den coninc Philips ende ander dinc. lxx.

 
Int selve iaer sende Inocencius
 
Die paus den legaet Gaulus
 
Ende enen cardenael mede,
 
Die was van harder groter zede,
5
Tot Philippe van Vrancrike,
 
Ende an alle sine princen gelike,
 
Ende onboot hem ende heet met
 
Dat si vergaderden al ongelet
 
Aldat here dat si mochten
10
Ende dat tenen hope brochten
 
Op Thollusen ende Albugensen mede,
 
Ende verbone oec die stede,
 
Ende al tlant dat leget daer,
 
Struwere ende versla daer naer
15
Alle die ketters entie ongelove,
 
Of sine bekeren int ghelove.
 
Ende eist dat yement inden stride
 
Of onderlinge bander side
 
Van uwen lieden blivet doot
20
In enighen sticken, in enigen noot,
 
Die obsalvieric van allen sonden,
 
Ende maken quite also tier stonden,
 
Als of hi thant geboren ware,
 
Op dat hi sine biechte spreke dare.
25
Willam van Ripen, ende oec met
 
Die maerscailc, die waren geset
 
Te behoeden Pontoyse tlant.
 
Si hebben nu den coninc gescant (sic)
 
.xl. ridders, die si nu saen
30
Voer Pontoyse hebben gevaen.
 
Int ander iaer Mellua vorwaer,
 
Een edel man ende getrouwe openbaer,
 
Onboot Philips van Vrancrike,
 
Dat waerlijc een casteel rike
35
Die Engelsce hadden in hant,
 
Dat leghet in Clene Bartaengen lant.
 
Philips die coninc die wort erre
 
Ende vergaderde volc bi ende verre
 
Ende voer daer ut harde saen
40
Ende heeft die engelsce al ondaen
 
Enten casteel gewonnen weder,
 
Ende gaven daer in ghichten zeder
 
Willam den ridder, sonder waen,
 
Die hem die dingen dede verstaen.
45
Doe die coninc soude weder keren
 
Quamen iegen hem die heren,
 
Bisscoppen, prelaten ende ridders mede,
 
Ende baden den coninc op die stede
 
Dat hise ontfinge, sine wouden niet,
50
Nemmermere, doen iegen hem yet;
 
Ende al dat si hadden misdaen
 
Wilden si nu betren saen.
 
Dus scoude die coninc al quite daer
 
Ende liet hem thare gebruken daer naer.
55
Ende om dit, so senden si also nu
 
Totten paus, dat segic u,
 
Om tlant entie baroene
 
Alle uten banne te doene.
 
+Int selve iaer Jan van bleven, (sic)
60
Die grave, is te coninge verheven
 
Te Jherusalem in die stede,
 
Ende zijn wijf gravent mede (?).

Hoe onse liede voeren op die Albugensen. lxxi.

 
Nu in dit selve iaer
 
So cruusten si hem al openbaer
 
Die Fransoyse mit groten scaren,
 
Ende sijn op die Albugensen gevaren;
5
Entie grave van Tholouse
 
Was haer leder van alre noyse,
 
Entie paeus mit enen legate
 
Obsalvieretse van allen state.
 
Dus voeren si in ghenen lande
10
Ende wonnen ene stat te hande
 
Die Biterren is genant.
 
Onder mit zwerden ende verbrant
 
Blever doet in die stat
 
.xvij.m, ende na dat
15
Beleiden si Carthosona.
 
Maer Rogier maecte daer na
 
Paeys ieghen donse, Godweet,
 
Dat si wech ghingen gereet.
 
Sonder enighe dinc, die si
20
Dragen souden, ghingen si vri.
 
Symon van Montfort mede
 
Helt oec getrouwichede
 
Ende voldede al sijn belof
 
Daer men bezwoer daer of.
25
Doe die Abulgensen vernamen
 
Dat die Fransoyse in 't lant quamen
 
Bespieden si waer si mochten
 
Hoe si donse te scanden brochten.
 
Enen abt vander ordinen
30
Van Cestiaus si sere pinen
 
Met sinen moniken, want sise doot
 
Daer na sloegen, clene ende groot.
 
Een Gheraerd van Pippio
 
Ende (sic) gelovede enen pape so
35
Met .vi. ridders ende .l. knechte
 
Te gheleden wel gerechte
 
Totten onsen sonder scade;
 
Maer hi pensede anders in sinen rade,
 
Ende deetse eten, des ghelooft.
40
Daer heeft hise alle berooft
 
Ende in enen kerker gedaen
 
Ende wildse daer doen lochen saen
 
Onser vrouwen van hemelrike.
 
Men stacker vier onder dies gelike
45
Ende wilse verbernen altemale.
 
iij. daghe stoectmense also wale,
 
Nochtan en waren si verbernt niet,
 
Pape no knechte, no verdriet
 
En hadden si. Doe namen si wt
50
Twe ridders overluut
 
Ende wildense of doen gaen hare wet.
 
Doe mense hierin onbesmet
 
Vant ende niet en wilden vertien
 
Hare wet, om gheen castien,
55
Doe nam hi sinen dume saen
 
Ende stac hem doghen wt, sonder waen,
 
Ende sneet hem of beide die oren,
 
Ende hoer voerste lippen voren,
 
Daer die een staphans of starf.
60
Die grave van Susensen oec bedarf
 
Der onser vele mit sinen zone,
 
Want hise vrede sere na tgone.

Van Sinte Dominicus enten keyser Otten. lxxij.

 
Int selve iaer van Sinte Dominicus
 
Was wt gesent om prediken dus
 
In Hyspanien in vele stede
 
Dongelovie (sic) liede senden mede
5
Ketters ende ander quadien,
 
+Die hi gherne soude castien,
 
Als hi oec dede in sijnre tijt.
 
Menigen zwaren groten strijt
 
Haddi mit woorden iegen die quade,
10
Eer hi se brochte ter Gods genade.
 
Si worpen met modder hem na
 
Ende spoegen claetsten, als ict versta,
 
In sijn aensicht, te meniger ure,
 
Ende spraken an mit worden sture;
15
Maer hier om en liet hijs niet,
 
No om pine, no om verdriet,
 
Hine predicte Gods wort altenen:
 
Men mochten daer of niet verenen
 
Dus predicti wel .x. iaer
20
Ende brochte tlant te punte daer
 
Mit vasten, mit bedinge mede,
 
Mit sonderlinge leven dat hi dede,
 
Ende daer die lieden op sagen sere:
 
Hier mede brochtise tonsen Here.
25
Int selve iaer Innocencius
 
Die paus dede comen aldus
 
Otten des hertogen zone
 
Van Zassen; maer ieghen tgone
 
Was die coninc van Vrancrike:
30
Die paeus dede doe sekerlike
 
Den keyser zweren, dat hi soude
 
Sinte Peters patrimonie mit gewoude
 
Bescermen, die Vrederic te voren
 
Dicke hadde helpen storen.
35
Na dit gesproken quam hi nochtan
 
Te Rome waert, mit menigen man,
 
Om ene scout die van rechte
 
Die van Rome hem verplechte.
 
Die Duutsce entie Romeyne aldoe
40
Worden in twivel om dit also,
 
So dat der duutsce bleven vele doot.
 
Daer na die keyser den
 
Romeynen ontboot
 
Dat hi .m. ende .c. papen mede
45
Verloos aldaer vor die stede,
 
Sonder liede die si verslogen daer.
 
Om dit soudi doen daer naer,
 
Waer hi mochte, scade groot.
 
Mettien voer hi mit sire conroot
50
Int lant al omme ende struwerde dat
 
Ende rovede dorpe, castele ende stat,
 
Ende nam Sinte Peters rente met,
 
Die hem int lant was geset.
 
Daer na voer hi te Poelgen waert
55
Ende struwerde daer ter vaert,
 
Ende wan daer op vele castele
 
Die Sinte Peter hadde te dele;
 
Ende dat men van hem hilt int lant
 
Heefti an hem gesaect thant
60
Doe hi dit dus niet laten woude,
 
Doe verbanden also houde
 
Die paus; mar dit en diede niet:
 
Hi dede der kerken te mere verdriet
 
Ende weder stont ende rovede mede
65
Die pilgrine die te Romen der stede
 
Gaen wilden, wast nacht, wast dach.
 
Doe die paus dit gesach,
 
Verbien die paus al gemene
 
Diene keyser hieten na tghene,
70
Oft mit hem waren nu.
 
Om dit gebod, dat segic u,
 
So sciet van hem Landogranus
 
Van Doringen ende van Magintius
 
Die biscop ende van Triere mede,
75
Oec die bisscop van der stede
 
Entie hertoghe van Oostrike,
 
Entie coninc van Beem dier gelike,
 
Ende vele andre, also wel leke
 
Als clercke,
80
Lieten daer in desen gewerke.

+Hoe die bulgerien worden ghestort. lxxiij.

 
Doe men screef ons heren iaer
 
M.CC.X. vor waer,
 
So wonnen onse liede Minebyan,
 
Daer in oec menighen man.
5
Ende alle die wilden ave staen
 
Haers ongelove set men zaen
 
Quite ende vri ende ongescent.
 
Nochtan vant men daer na sent
 
C. ende .lxxx. die hem lieten
10
Verbernen eer sijs wilden genieten
 
Dat si hare quaetheit of ghingen.
 
Doe togen si na desen dingen
 
Voer Terewijc enen casteel,
 
Daer scoot een starc quareel
15
Mit enen armborst so groot,
 
Dat was boven maten groot.
 
Ende geraecte der onser een
 
Op sine borst, dat op enen steen
 
Moeste die ghene averecht vallen
20
Ende gaf enen val ogesiens hem allen
 
So vreselijc ende so groot,
 
Dat sere donrede ende verscoot.
 
Nochtan die gene op stont
 
Ongequetst, onghewont;
25
No gat no score en haddi mede
 
In sijn cleet te ghere stede.
 
Doe sire lange hadden gelegen
 
Wort dat casteel op gedreghen
 
Ende som vloen si snachts daer wt.
30
Maer die eer si voeren overluut
 
Sloeghen donse al over doot
 
Een Geraerd, een bugger groot.
 
.iij. papen ende .l. kerstine
 
Dedi mit viere grote pine
35
.iij. daghe dede hise bernen gereet.
 
Nochtan daer na, God weet,
 
So worden si na die stonden
 
Van den viere ongebernt vonden.

Van meester Amelrics heresien. lxxiiij.

 
In desen tiden was Amelrijc
 
Een groot clerc, maer sekerlijc
 
Int gelove was hi clene;
 
Want hi wil seggen gemene,
5
Dat elkerlijc soude geloven
 
Dat hi Gods let van hier boven
 
Selve waer, ende dit oec es
 
Een artikele, des sijt gewes,
 
Daer die man niene mach sonder
10
Behouden bliven. Dit groot wonder
 
Dedi menighen verstaen.
 
Ende hier om so wort hi saen
 
Van menighen kersten meester nu
 
Wederseit, dat segic u.
15
Doe hi gevoelde den weder stoet,
 
Dat die paus mede geboot
 
Hem te proeven of dat hi
 
Ant ghelove blive vri,
 
So lyedi mitten monde das
20
Dat tsine al niet en was;
 
Maer in therte bleef hi staende.
 
Van den gelove bleef hi gaende;
 
Ende om dat hi hier in bleef,
 
Al heymelike iegen tghelove screef,
25
So seit men dat hi zaen daer naer
 
Op sijn bedde verbernde vor waer,
 
Ende also sinen ende dede.
 
Ende na sine dood sulc oec mede
 
Hilden hem an sine lere
30
Ende maecten werringe daer na mere;
 
Want si wilden maken .j. nuwe wet
 
Ende dander dus hebben verset.
 
Si seiden dat tsacrament soude
 
...

Vorige Volgende

Over dit hoofdstuk/artikel

titels