Chronijcke van Leeuwenhorn

[fol. B4r]

Hierna volcht een rustich nieu Liedekē van het vermaerde dorp van Scagen / van zijn gestalte / daden ende kueren / by hem gedaen / Gaet op de wyse. Geeft my te drinckē na mijnen / etc.

Schagen edel Lansdouwe / / soet
U moet ick prijsen en loven /
Bewoont van Mannen en Vrouwen / / breet
Beset met schoone huysen en boven /
Veel dorpen gaet ghy te boven /
Van Rijckdommen wel voorsien
Met Comenschap bestoven
U straten en plaetsen propijs by dien.

Edel en hooch zijt ghy besaemt /

Onder veel Steden en Landen /
In eene cleye gront versaemt /
Bepaelt aen die Sijpsche stranden /
Gheen vloet can u aenranden /
Een Seedijck die u bewaert /
Veel visch comt u te handen /
Voghels van mengher aert.

Schaghen heeft nu eenen Kerck /

Met twee meelmolenen schoonen /
Een Slot al ist niet al te sterck /
Een Edel Heer gaeter op woonen /
Al uyt die Fransche Croonen /
En oock uyt het Beyers gheslacht /
So zijn Wapenen al vertoonen
God gheef hem Wijsheydt ende cracht.

Dit dorp dat is seer wel ghedaen /

Versche Meeren rontsom vloeyen
Met Claver Weyden die vol bloemkens staen
Daer op soo loopen Hollantsche koeyen /
die Boomgaerts lustich daer bloeyen /
Ghy vinter soo soeten vrucht /

[fol. B4v]

 

Al datter weyt dat wil wel groeyen /

 

daer is oock bequame lucht.

 

Tvolck is daer soo glorieus

 

Sterck van beenen en van leden /

 

Elck man schijnter te zijn een reus /

 

Soet van manieren ende zeeden /

 

Fray van habijt en cleeden /

 

Oock lieflick van spraeck en tael

 

Propijs in langt en breeden /

 

O Schaghen ghy bent soo soeten dael.

 

Magnus den vromen Capiteyn /

 

Die met den huys ende den Deghen

 

Voor Damiaten die Stad teyn /

 

Hem dapper en fray heeft ghedreghen /

 

dies hy den Roos heeft creghen.

 

En die binnen Schagen gheplant

 

Met Lelien reyn om ghesleghen /

 

dees Roos voert oock Enghelant.

 

Schaghe ghy Schaghen hooghen moet

 

Die zijn Lantsheer noyt heeft besweecken

 

doen Winckel quam al onder voet

 

Hebstu prijs en eer gestreecken /

 

dyn couragie heeft noch ghebleecken

 

Al doen den Spaniaert om Alckmaer lach /

 

Tsy haer die dijn eer willen breecken /

 

du biste noch fray op desen dach.

 

Prince

 

Een schoon Previlegy te handt /

 

Creecht ghy van Princen en Lantheeren /

 

Om u Vrome daden valiant /

 

dus hout Justitie in eeren /

 

Laet tweedracht al passeren /

 

En jaecht die boose te lande uyt

 

So sal den Burgher triumpheren /

 

Hout Vrede dats mijn besluyt.

F I N I S.