Amorum emblemata

[p. IV]

In Emblemata Amatoria Othonis VaenI Hugonis Grotii epigramma.

Questus Amor nondum sua respondere triumphis

Praemia, nec famae quod satis acta sequi,

Mille per artificum spatiatus millia, legit

Ottonis doctas aes animare manus.

Ipse regit ferrum, vultus ipse imprimit aeri,

Et gaudet duris durior ipse puer.

At laetus monimenta Dei victricia mundus

Accipit, & plaudit cladibus ecce suis.

Ecce Cupidineas omnis iam dextra tabellas,

Et Paphios lusus iam sinus omnis habet.

Praeda puellarum iuuenes, iuuenumq́ue puellae,

Cernite quid valeant tela potentis heri.

At vos ite procul, tutò quibus ista videre

Spes erat, & pictus laedere nouit Amor.