LXIIII, Psalmen end ander ghesangen, diemen in de Duytsche Ghemeynte te Londen was ghebruyckende
(1561)–Jan Utenhove–
AuteursrechtvrijOp de Ouerlantsche wijse.
VUy geloouen in eenen God alleyn,
Schepper des Hemels en der Aerden,
Die Uader is ons aller ghemeyn,
End laet ons zijn kinderen werden,
Hy wil ons altijt gheneren,
Lief en ziel oock wel bewaren,
All ongheual wil hy weeren,
Gheen leydt sal ons teghen varen,
Hy sorcht ende waect voor ons dach en nacht,
Alle dinghen staen in zijnder macht.
Wy geloouen in Christum alle gelijck,
Synen Soon end onsen Heere,
Erfachtich in zijns Uaders rijck,
Ghelijck God van macht ende eere.
Uan de reyne maeght Marie,
Een warachtigh mensch gheboren,
Door Gods Geest na t’Schrifts belijden,
Uoor ons door de sonde verloren,
Aen’t cruys ghestoruen ende gheleyt,
| |
[pagina 52v]
| |
In’t graf, tot zijns doots sekerheyt.
Ten derden dage om ons gerechticheyt
Uan den dooden is opghestanden,
Door t’Uaders kracht in heerlicheyt,
Uerlossende ons wt vyants banden,
Is ten Hemel op verheuen,
Uan der Aerde’ in’t openbare,
Sit ter rechter Gods beneuen,
Uoor ons een recht Middelare.
Uan waer hy ten eynde komen sal,
Richtende leuende ende dooden al.
Wy geloouen in den heylighen Gheest,
God met den Uader ende den Sone,
Die ons troost ende maeckt onbeureest,
En ciert met gauen schoone,
Die gantsche Christenheyt verheuen,
Tot een eenicheyt begheuen,
Dien de sonden zijn vergheuen,
Dat vleesch sal noch weder leuen,
Na desen iammer is bereyt,
Ons een leuen in eewicheyt.
|
|