LXIIII, Psalmen end ander ghesangen, diemen in de Duytsche Ghemeynte te Londen was ghebruyckende

Oratio Dominica.

Op de Ouerlantsche wijse.

VAder onser in Hemelrijck,
Die ons heet broeders all ghelijck,
End wilt dat wy dy roepen aen,
Als wy met noode zijn beuaen:
Gheeft dat niet bidde alleyn de mont,
Maer dat het ga van herten gront.

Gheheylicht dynen Name zy,
Dijn woort ongheualst ons blijue by,
Dat wy oock leuen heylichlick,
Na dynen Name weerdichlick,
Behoedt ons Heer voor valsche leer,

[p. 53r]

 

Dat arm veruoert volck bekeer.

 

 

 

Dijn rijck toekome O Uader goet,

 

Hier end hierna dynen Trooster soet.

 

Gheeft ons so Christus ons toesey,

 

Met synen gauen menigherley,

 

Breect Sathans toorn end groot gewalt

 

Uoor zijn ercheyt dijn Kerck erhaldt.

 

 

 

Dynen wille gheschie O Heer ghelijck,

 

Op Aerden als in Hemelrijck,

 

Gheeft ons ghedult in lijdens pijn,

 

Ghehoorsaem alle sins te zijn,

 

Neemt van ons wech vleesch end bloedt,

 

Dat teghen dynen wille doet.

 

 

 

Gheeft ons huyden ons dagelicx broot

 

End wat wy behoeuen in s’lijfs noot,

 

Behoet ons Heer voor twist end strijt,

 

Uoor peste ende oock voor dieren tijt,

 

Dat wy in goeden vrede staen,

 

Doet sorg ende giericheyt van ons gaen.

 

 

 

Al onse schulden vergheef ons Heer,

 

Dat sy ons niet bedroeuen meer,

 

So wy oock die ons schuldich zijn,

 

Haer schult vergheuen op dit termijn,

 

Tot haren dienst maeckt ons bereyt,

 

In rechter liefde ende eenicheyt.

 

 

 

Leydt ons Heer in bekoring niet,

 

Als ons die boose Gheest strijdt biedt,

 

Te rechter of ter slincker hant,

 

Help ons dat wy doen wederstandt,

 

In rechte betrouwen onbeureest,

 

Door dynen trooster den heyligen Geest.

 

 

 

Uan alle quaet verlost ons meer,

 

In dese bedroefde tijden O Heer,

 

Beurijdt ons van der eewigher doot,

 

End troost ons in den laetsten noot,

 

Doet ons altijt goedt onderstandt,

[p. 53v]

 

Neemt onse zielen in dyne handt.

 

 

 

Amen dat is het werde waer,

 

Sterckt ons ghelooue wanckelbaer,

 

Op dat wy daer niet twijfelen aen,

 

Of wy sullen dit al ontfaen,

 

Na dynen wille om Christus naem,

 

Door welcken ons bede is ghedaen.