LXIIII, Psalmen end ander ghesangen, diemen in de Duytsche Ghemeynte te Londen was ghebruyckende

Saepe expugnauerunt. Psalm.Cxxix. I.U.

§ Hier vermaent hy de Ghemeynte zick te verheughen, om dat sy, ghelijckerwijß sy van een yeder verdruckt is gheweest, verlost sal werden, End dat hare vyanden sullen schaemroot werden, niet teghenstaende haren ijdelen waenschijn.

Op de Franchoische wijse des selfden Psalms, Des ma ieunesse, &c.

SY hebben my dickmael van mijn ioncheyt aen, ⁺ Bestreden, nu Israel segghe mit sinnen: Sy hebben my dickmael van mijn ieughet aen, Bestreden, mer sy konden my niet verwinnen.

+ Hier wert bewesen dat de boosen niet ouerweldighen sullen de godsalighe, mer dat sy eyndelic vergaen sullen, de godsalighe behouden zijnde.

[p. 42r]

 

De ploughers my hebben teeckens inghedruckt, In mynen rugg, end gemaket groue voren, Auer de Heer gherechtigh heeftse verdruckt, End heur zeelen willen afsnijden end schoren.

 

 

 

Dat so beschaemt end verstooten werden stracks, Die Sion mit vyantlicken haet verdrucken. Datze oock ghelijck werden den graze des dacks, Dat daer verdort, eermen t’zelue kan gheplucken.

 

 

 

Daer van zijn hand de maeyer niet vullen kan, Noch haren schoot die de handbussels verzamen. Die daer voorby gaen wenschen gheen gheluck an, Segghende: v zy geluck in s’Heeren Name.