LXIIII, Psalmen end ander ghesangen, diemen in de Duytsche Ghemeynte te Londen was ghebruyckende

Qui habitat in adiutorio. Psalm.xcj. I.U.

§ Hier beschrijft Dauid de groote zekerheyt end voorspoedigheyt der geloouigen.

[p. 28r]

Op de Franchoische wijse des selfden Psalms.

VUie zijn vetreck neemt tot den schut
Des die dat hooghst’ in woonet,
Die sal als in een seker hut,
Onder Gods schadu woonen,
So segt hy ernstlick tot den Heer,
God is mijn toeulucht reyne,
Mijn burg, mijn hoep, der haluen seer,
Stuen ick op hem alleyne.

Want van des iaghers strick sal hy ⁺
Dy vrijen end wttrecken.
Oock vander pest hoe zwaer sy zy,
Hy sal dy schoon bedecken
Mit zijn vlercken: du salt vrij zijn
Onder zijn vederen teere,
Mit zijn trauw werdstu bedeckt fijn
Als met een schild end speere.

So dat du niet te vreezen heefst
Wat gruzaem is by nachte,
Noch voor den pijl (so lang du leefst)
Die s’daechs vlieght dy te wachten,
Noch voor eenighe pest die daer
In’t duyster heeft haer wesen,
Noch voor t’booß op den middagh klaer
Uerderflick opgheresen

Laet vallen dy ter lincker hand
Duyst, end thien duyst ter rechter,
So sal sulck iammer schaed end schand
Dy gantslick niet aenuechten.
Mer du salt haer verderf sien zaen
Mir dynen eyghenen ooghen,
End de godloosen stracx ontfaen
Haren loon onbedroghen.

Want om dat du tot den Heer reedst

+ So wie zick Gode wt gantschen herten beueelt, die sal beurijt werden van allerley misual, &c.

[p. 28v]

 

Du bist mijn toeulucht reyne.

 

End om dat du in’t hoogh besteetst

 

Dijn hoep op God alleyne:

 

Gheen ongheluck kan dy voortaen,

 

Eenigher wijze aennijpen,

 

Gheen plaghe zalder oock aenstaen,

 

Die dijn hut kan aengrijpen.

 

 

 

Want hy zal synen Englen snel

 

Beuel gheuen te deghen:

 

Dy te bewaren rechtßins wel,

 

In allen dynen weghen.

 

Op heur handen zullen zy dy

 

Draghen, dat dijn voet bloote

 

Niet struyckele, noch zick onvry

 

Teghen eenen steen stoote.

 

 

 

Op Luparden end Slanghen fel

 

Du zalt onbezorght treden.

 

Leeuwen end Draken euen wel

 

Zalt du schaedloos betreden.

 

Om dat hy my lieft (spreeckt de Heer)⁺

 

Zo wil ick hem beweeren

 

Ick wil zijn huld zijn langks zo meer

 

Want hy mijn naem vereeret.

 

 

 

Hy zal my aenroepen mit vliet,

 

End ick sal hem verhooren.

 

Ick sal hem by zijn in’t verdriet,

 

Hem redden end vereeren.

 

Uollen zal ick met daghen veel,

 

Zulckerley eenen mensche.

 

Ick zal hem oock rijcklick mijn heyl

 

Uertoonen t’zynen wensche.

+ De geloouige hebben hulp end bystand te verwachten.