LXIIII, Psalmen end ander ghesangen, diemen in de Duytsche Ghemeynte te Londen was ghebruyckende

Benedixisti Domine. Psalm.lxxxv. I.U.

§ Dauid door de heyligen Gheest singt ende propheteert van der toekoemste Messie, ende van zijn geestelick Koninckrijck, in’t welcke gerechticheyt, vrede end waerheyt sullen regneren, gelijck oock Esa.11. staet, ende eyndelicken bewijst hy oock, hoe der gheloouigher sonden, door Christum wechgenomen zijn, so Danielis in’t 9. ende Miche.7. staet, ghelijck oock het gheheele nieuwe Testament leert.

Op de Franchoische wijse des l. Psalms Le Dieu le Fort &c.

[p. 25r]

 

DIjn Aertrijck Heer genade hebstu ghedaen, Du hebst Iacob vanden banden ontslaen, Du hebst dijns volcx boosheyt ghenomen wech, Sijn sonden al wt ghenaden hebst bedeckt, Dijn gramschap groot, hebstu versoet ten eynde, End dynen toorn daervan oock willen wenden.

 

 

 

Keert dy tot ons God onses salicheyts, Went van ons af den brant dijns toornicheyts, Wilstu alwech tegen ons zijn verstoort. Of dynen toorn vertrecken van nu voort, Bistu niet die, ons ten leuen wil bringen, Waer voor dijn volck in dy sick sal entspringhen.

 

 

 

Toont doch O Heer ons dijn barmherticheyt, Ghenadelick gheeft ons dijn salicheyt, Hooren wil ick, wat God de Heere mildt, Spreeckt, want tot zijn volck vrede spreken wilt, Ende oock daer toe weldadich zijn tot allen, Op dat sy niet tot sotticheyt veruallen.

 

 

 

T’heil is voorwaer den Godvreesenden by, op dat by ons d’heerlicheyt ware vrij, Ghenade en waerheyt komen sick in’t ghemoet, Rechticheyt en vreed sullen sick kussen soet, ⁺ T’ghelooue sal vast spruyten wt der Aerden, Gherechticheyt sal wt den Hemel gheschouwt werden.

 

 

 

De Heer sal oock zijn goedertierenheyt, Gheuen seer mildt en storten ouer breydt, Ons Aerdrijck sal zijn vrucht bringhen voort, In oueruloedt al na des Heeren woort, Gherechticheyt sal voor den vromen treden, En ouer wech sal hy fijn gaen in vreden.

+ Dit is den staet vanden gelucsaligen tijt des gheestelicken Konincrijcx Christi.