LXIIII, Psalmen end ander ghesangen, diemen in de Duytsche Ghemeynte te Londen was ghebruyckende

Domine quis habitabit. Psalm.xv. I.U.

§ Hier wordt verklaert, wiemen voor warachtige lidtmaten Christ houden sal.

Op de Franchoische wijse des selfden Psalms.

O Heer wie sal in d’hutte dijn,
Uerkeeren met allerley lusten?
Wie sal doch so gheluckich zijn,
Dat hy door dijn ghenade fijn,
In dynen heylighen berch sal rusten.

Het sal de man zijn sonder fael,
Die eenuoudich gaet in zijn leuen,
End die daer recht doet ouer al,
End wiens mont in zijn herte sal,
Tot de waerheyt tuyghnisse gheuen.

Die door zijn tonghe niet en doet,
Achterklap tot eens anders schade,
Noch synen naesten niet misdoet,
Die synen nabuer oock behoedt,
Dat men hem met schande niet belade.

Die ooc veracht de Sondaers quaet,
End eert die door s’Heeren ghenade,
God alwech vreesen met der daet,
Die zijn belofte houdt sonder baet,
Ia al waert schoon tot zijnder schade.

Die zijn ghelt tot woecker niet gheeft,
End oock gheen gauen wilt ontfanghen,
Ouer den onnooselen man,
Die hem hier in so draghen kan,
Sal stadich blijuen in zijn ganghen.