Psalmen Davidis

in Nederlandischer sangs-ryme

Lauda anima mea. Psal.cxlvi.

Dauid verweckt Godt te louen: Vermaent eenen iederen sich niet te vertrauwen op menschelicke macht, mer op Godt alleene: ende dat wt aenmercken der grootheyt syner macht ende goedicheyt, die sich beide inder scheppinghe ende ghenadigher erhoudinghe aller dinghen bewysen.

LOoft den Heeren, o siele myn,
Ick sal den Heer’ altyd louen,
End mynen God toe-

[fol. 235r]

singhen fyn,
So langh’ als ick blyu’ hier bouen,
De vorsten fier,
Betrauwt niet hier,
Hoe groot sy syn op erden:
Noch menschen soon,
Daer niemand schoon
Emmer saligh door kan werden.

Wiens lichaem als de gheest verscheydt,
Moet keeren snel in syn erden,
End met hem haest nedergheleyt
Alle syn ghedachten werden,
O wel saligh,
Wiens hulp daer ligt

[fol. 235v]

 

In Iacobs God alleine:

 

End die daer vast

 

Syn hoop beuest,

 

Op synen God, anders gheine

 

 

 

Die daer heeft hemel, erd’ end Meer

 

Ghemaeckt end wat daer is inne:

 

Die den synen in allen keer

 

Houdt trauwe met vasten sinne.

 

Die Heer doet recht,

 

End wreeckt den knecht

 

Dien men verdruckt op erden.

 

Hy laet oock brood

 

In aller nood

 

Den hongherighen ghewerden.

 

 

 

§1 De Heer is den gheuanghnen goed,

 

De selue laet hy vry wten.

 

Die Heer weldaed den blinden doet,

 

Maeckt dat huer’ ooghen ontsluyten

 

Die Heer ter stond

 

Heft op ghesond,

 

De kruepels end ellenden:

 

Die Heer lief heeft

 

So wie recht leeft

 

End die hen na rechtheyt wenden.

 

 

 

Die Héer bewaert de vremd’ alwech,

 

Uerheft wedewen end wesen:

 

Hy verderft oock der boosen wegh,

 

Die hem niet lieuen noch vreesen

[fol. 236r]

 

Die Heer aen breyd

 

In eewigheyt

 

Sal heerschen end regneren,

 

End dyn God friss

 

Oock eewelick,

 

O Sion, louet den Heeren.

Ghebedt.

§ O Godt, die du hemel ende erde ghemaeckt hebst, ende bist warachtigh in dynen beloften, maeck dat wy niet op menschen (die doch gants swack ende amechtigh syn) dan op dy alleene vertrauwen, ende onse hope setten, ende na dien het dyn welgeuallen geweest is, ons tot dyner ghemeynte, dat wy dyne waren, te roepen, wil dat ordeel vellen ouer de ghene die ons beleedigen ende veronghelycken op dat, wan der godeloisen wech angewendet, ende den vromen recht wederuaren sy, een ieder leere dy vruchten ende prysen in alle dynen wercken, door Iesum Christum, Amen.