Dauid verhueghet sich ouer den opgaen na Ierusalem die ten wtuerkoren stede ten dienste Godes was. Beschriift huere goede ordeninghe, ende bidt voor hueren voorspoed
Inder wyse des .lxvi. psalmes
ICk ward verblydt doe my daer was gheseyt:
Laet ons met vliet tot s’Heeren hus opgaen
Ierusalem, die fyn bist toebereydt,
In dyn poorten sullen onss voeten staen.
Ierusalem is doch seer wel ghedaen,
Wel ghetimmert, als een stadt gaer vol eeren,
Daer de menschen door eenigheyt vermeeren
Tot Welck’ opgaen de gheslachten ghemeyn,
Gods gheslachten dat huyss Israels vroom,
(Waertoe verbonden is so groot so kleyn)
Om Gods name lof te belyden koen:
Want daer staen de stoelen om recht te doen,
Naemlick Dauids huyss stoelen wilt goed gunnen
[Folio 208v]
[fol. 208v]
Ierusalem, wel hen diese beminnen.
Urede moet syn binnen dyn mueren still,
End spoedt binnen dynen paleysen friss
Om myner broederen end vrienden wil,
Sal ick spreken wat dy voorderlick is:
Ouermits dat ickse lief heb ghewis,
End om onss Gods huyss wil, in dy ghestanden
Sal ick soecken dyn spoed in allen standen.
Ghebedt.
§O goedige God, doe ons die ghenade, dat wy also ingheschreuen werden in dyne Ghemeynte, dat wy daer nummermeer van wycken: daer oock in sulcker eenigheyt erhouden ende verbonden werden, dat wy mit vrede dynen name groot maken in eewigheyt door dynen Sone Iesum Christum. Amen.
Auteursrechtvrij