Psalmen Davidis

in Nederlandischer sangs-ryme

Confitemini Domino. Psal.cvviii.

Dauid maeckt groot de goedicheyt Godes, ende verweckt de Ghemeynte dartoe, wt dien, dat hy en wt alle synen oeuelen verlost, ende ten koninge ouer Israels (ondanck Sauls ende ander erregenten des volckes) beuestet heeft. Werdt hierinne bewesen een ware voorbeeldt Christi te syne. Math. 21.

DAnckt God mits dat hy goed is, son-

[fol. 194r]

der myden,
Want syn bermhertigheyt blyft t’allen tyden,
Israel nu segghe van herten vry,
Dat syn goedicheyt blyft in éewigheyden,
Aarons huys oock segghe met bescheyde,
Dat syn goedertierenheyt eewigh sy.

Die daer den Héer vréesen laet vry vermonden,
Dat syn bermhertigheyt blyft t’allen stonden.
Doe ick in angst was so riep ick God an:
End heeft my verhoort end ghestelt in’t breyde.
Dewyl die Héer dan vast staet aen myn syde,

[fol. 194v]

 

So vrees’ ick niet wat my de mensch doen kan.

 

 

 

Die Heer is voor my met mynen bystandern,

 

So sal ick sien myn will’ aen myn vyanden.

 

T’is beter te hopen op den Heer sacht

 

Dan op den sterflicken mensch te vertrauwen:

 

Ia beter is syn hop’ op God te bauwen,

 

Dan op vorsten, hoe groot sy syn gheacht.

 

 

 

§1 Als wouden my vele menschen omringhen,

 

Ick hoopse door s’Heeren naem wel te ringhen:

 

Als wouden sy my omringhen tot leydt,

 

So sy ghedaen hebben, ick woudes’ alle

 

Sonder ontsicht gantslick brenghen ten valle

 

Door des Heeren naem end bystandigheyt.

 

 

 

Als waert dat sy, als bieswermen in ringhe

 

My aenquamen, als doornenuyer gheringhe,

 

Sullen sy stracks swycken end t’ondergaen:

 

Ick hoopse door s’Heeren naem t’oueruallen.

 

Du vyand, du heefst my willen doen vallen,

 

Mer de Heer heeft my fyn bystand ghedaen.

 

 

 

De Héer is myn sterckheyt end myn ghesanghe,

 

Myn saligheyt oock wanneer my is banghe.

 

In der gherechten huysen hoortmen niet

 

Anders dan een stem vol allerley ieughden:

 

Dewyl des Héeren recht’ hand, t’onser vrueghden

 

Groote dinghen ghedaen heeft metter uliet.

 

 

 

§1 S’Héeren recht’ hand heeft verheuen ghewesen

 

End heeft groote daden krachtlick bewesen,

 

Steruen sal ick niet, mer sal leuen fyn,

[fol. 195r]

 

End sal s’Heeren groote wercken verkonden,

 

Hy Héeft my wel ghestraft, ick moett vermonden

 

Mer héeft my niet gheleuert in sdoods pyn.

 

 

 

Doet my op des temples poort, den gherechten

 

Toegheeyghent, end inghegaen ten rechten

 

Sal Gode van my danck werden ghedaen.

 

Dese poort’ is Gods poort, waerdoor intreden

 

De gherechten, Ick wil dy, Heer, danck reden,

 

Dat du my heefst verhoort end byghestaen.

 

 

 

§3 De steen dien als onnut hebben verworpen

 

De bauwlieden, des’ is tot s’hoecks hoofd worden

 

Met grooter eer: dits vanden Heer ghedaen,

 

End het is wonderbaer in onsen ooghen:

 

Dit is de dagh daerin wy ons wel moghen,

 

Uerhueghen, dien de Heer’ heeft aengheuaen.

 

 

 

Wy bidden dy, o Heer, wil ons nu hoeden,

 

End in deser ghelucksaemheyt behoeden:

 

Ghelucksaligh is die daer komen is

 

In des Heeren naem’ hooghelick ghepresen.

 

Wy die daer van des heeren huyse wesen,

 

Alle gheluck wenschen v toe ghewis.

 

 

 

De Heer’ is sterck end sal ons klaer licht gheuen

 

Bindt den oss aen d’autaers hoornen verheuen.

 

Du bist myn God, ick sal dy dancken fris,

 

Myn God, ick sal dy met loue verheffen.

 

Na Gods lof (mits dat hy goed is) wilt treffen

 

Want syn bermhertigheyt doch eewigh is.

[fol. 195v]

Ghebedt.

§ Goedertieren ende barmhertighe vader, die du nummermeer verlatest de ghene die sich op dy vertrauwen, ende castyest de dynen vaderlicken to huerer saligheyt, maeck, dat wy als leuende steenen also op Christum Iesum (die dat eenighe ende rechte fondament der ghemeynte is) ghebauwet werden, dat hoewel hy vanden menschen mispresen ende verworpen, van ons dannoch altydt voor onsen koningk end salighmaker erkent werde, dat wy also eyndelicken de vrucht dyner goedicheyt ende barmhertigheyt genieten. Amen.