Psalmen Davidis

in Nederlandischer sangs-ryme

Venite exultemus, Psalm,xcv.

Hy vermaent dat volck met treflicken spruecken Godt te prysen predicket syne oneyndelicke moghentheyt ende wysheyt nademale hy alles gheschapen heeft wt niete: oock syne barmhertigheyt ende goedicheyt, daer mit hy insunderheyt de godsalighen regiert. Item erschrecket door dat exempel der ouden die inder woestyni verghinghen van godloosheyt ende ongheloouigheyt.

Inder wyse des lxvi psalmes

KOmt laett ons vro den Heer syn,
End der rotss onses heyls ieuchen
Laet ons voor hem dancksegghen fyn,
End ons met lofsangk verhueghen:
Want die Heer ghewis
Een recht groot Godt is,
Uoor een Koningk groot
Is hy bekent in noodt
Ia grooter dan alle goden.

[fol. 156v]

 

In wiens handt d’ erde diepten syn,

 

End de berghen spitsen hooghe:

 

Wiens d’Meer is door hem ghemaeckt fyn,

 

End synr handen werrk is t’ droghe.

 

Nu ghelyck wel aen,

 

Komt, latet ons gaen,

 

Hem aenbidden fyn,

 

End buyghen onse knyen

 

Uoor den Heeren onsen schepper.

 

 

 

Want hy is onse Godt end Heer,

 

End wy syn t’ volck syner weyden,

 

End syner handt het kudde teer,

 

Welck hy seker kan gheleyden.

 

So ghy huyden hoort

 

Syn stem, verhardt voort

 

Uw’ herten doch niet:

 

So in Meriba is gheschiedt

 

Ten proefdagh’ in der woestyne.

 

 

 

Waer uw’ vaders versochten my.

 

Proefden end myn wercken saghen.

 

Ick heb ghehadt viertigh iaer vry

 

Aen dit gheslacht een mishaghen.

 

So dat ick sey daer,

 

Dit volck dwaelt doch gaer:

 

T’kent niet den wegh myn,

 

Dies heb ick ghsworen fyn,

 

Dat’t in myn rust niet sal komen,

Ghebedt.

[fol. 157r]

§ O Heer onse Godt, na dien het dy gelieft heeft ons die ghenade te doene, dat wy dyn volck syn ende schapen dyner kudde: wil vermorwen onse herten ende buyghen tot sulcker ghehoorsaemheyt, dat wy dy erkennen Heere des hemels ende der erden te syne, ende dy behoorlicken aenbidden, ende dat wy erkennen dyne weghen, ende daerin wandelen alle de dagen onses leuens, dat wy endelicken ghenieten de ruste die du toeghesecht hebst den ghenen, die dar trachten dynen wille te volbringen, door dynen Sone Iesum Christum. Amen.