Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxij.

1

ENd hy weeß my ^‡ eęnen louteren stroom leuendighen waters, klaar als crystall, die quam van dem throone Godes end des Lamms.

‡ Ezec.47.a.1 Zach.14.b.8

2

Midden op hœrer strate, end op beyden zijden des strooms [stond] holt des leuens, dat drough twæluerley vruchten, end bracht zijn vrucht alle maanden:

[p. 438v]

end de bladers des holts [dienen] ter ghezondmakinghe der Heydenen.

3

End dar zal gheęn veruloucksel meęr zijn: mer de throon Godes end des Lamms zal daerin zijn:

4

End zyne dienstknechten zullen hem dienen, end zijn anghezicht zien, end zyne naem zal an hœren voorhoofden zijn.

5

^+* End daer zal gheęn nacht zijn, end zy behouuen gheęner kærssen, noch lichts der zonnen: want God de Heęr verlicht ze, end zy zullen regneren van eęwigheyden tot eęwigheyden.

+ B

* Esa.60.d.19 Zach.14.b.7 Apoc.21.g.23

6

End hy zeyde tot my: Deze worden zijn gheloofßaem end waerachtigh: end God de Heęr der heylighen Propheten heeft zynen Enghel wtghezonden, te toonen zynen dienstknechten wat kortlick gheschiehen moet.

7

Zie, ick komme haestlick. ^* Gheluckzaligh is die dar holdt de worden der prophecy in dezem bouck.

* Apoc.1.a.3

8

End ick Ioannes bin het die zulcks zagh end hoorde. End doe ick het hoorde end zagh, viel ick neder, an te bidden voor den voeten des Enghels die my zulcks toonde.

9

End hy zegt tot my: ^* Zie toe dat du het niet [doest]: want ick bin dijn mede dienstknecht end dyner broederen der Propheten, end der, die dar holden de worden dezes boucks: Bid God an.

* Act.10.d.26 end .14.c.14 Apoc.19.b.10

10

⁺End hy zegt tot my: Uerzeghel niet de worden der prophecye in dezem bouck: want de tijd is naby.

+ C

[p. 439r]

11

Wie veronghelijckt, die veronghelijcke noch meęr: wie dar bezudelt is, die bezudele zick meęr. Wie gherechtigh is, die werde noch gherechtigher: end wie heyligh is, die werde noch heyligher.

12

End zie, ick komme haestlick, end mijn loon is mit my, ^* te verghelden eęnem ieghelicken als zijn werck zijn zal.

* Psal.62.d.13 Iere.17.b.10 end .32.c.19 Matt.16.d.27 Rom.2.a.6 end .14.c.12 1.Cor.3.b.8 2.Cor.5.b.10 Gal.6.a.5 Apoc.2.f.23

13

^‡ Ick bin het A end het O, beghinn end ende, ^* de eęrste end de leste.

‡ Apoc.1.b.8 end .21.b.6

* Esa.41.a.4 end .44.a.6

14

Gheluckzaligh zijn die zyne gheboden holden, op dat hœr macht zy in dem holte des leuens, end zy door de poorten gaen in de Stad:

15

^‡ Buyten auer [zullen zijn] de honden, end de verghiftighers, end de hoerérers, end de doodslaghers, end de afgoddienaers, end eęn ieghelick die dar lief heeft end doet lœghen.

‡ 1.Cor.6.b.10 Gal.5.d.21 Ephe.5.b.5 Coloss.3.a.6

16

Ick Iesus heb ghezonden mynen Enghel, v zulcks te betuyghen an de Ghemeynten. ^{+ *} Ick bin de wortel end het gheslæchte Dauids, end de klaerschijnighe Morghensterr.

+ D

* Esa.11.c.10 Rom.15.c.12 Apoc.5.b.5

17

End de Gheęst end de Bruyd zegghen: Komm. End wie het hoort, die zegghe: Komm. ^‡ End wem dar dorst, die komme: ⁺ end wie dar wil, die neme het water des leuens om niets.

‡ Esa.55.a.1 Ioan.7.f.37

+ D

18

Want ick betuyghe eęnen ieghelicken die dar hoort de worden der prophecye in dezem bouck: zo iemand daertoe doet, zo zal God toedoen op hem de plaghen die in dezem bouck gheschreuen staen.

19

^* End zo iemand afdoet van den worden des boucks dezer prophecye, zo

* Deut.4.a.2 end .12.d.32 Proue.30.a.6

[p. 439v]

zal God afdoen zijn deęl van dem bouck des leuens, end van der heyligher Stad, end van dem, dat in dezem bouck gheschreuen staet.

20

Het zegt die zulcks betuyght, Ghewißlick, ick komme haestlick: Amen. Ia, komm Heęr Iesu.

21

De ghenade onzes Heęren Iesu Christi zy mit v allen. Amen.

Ende des Nieuwen Testaments.