Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxj.

1

⁺ ENd ick zagh eęnen nieuwen hemel end eęn nieuwe ærde: (Want de eęrste hemel end de eęrste ærde ghingk voorby) end de zeę is niet meęr.

+ Esa.65.c.17 end .66.g.22 2.Petr.3.c.13

2

End ick Ioannes zagh ^* de heylighe Stad, het nieuwe Hierusalem van Gode wt dem hemel afdalen, toebereydt gelijck als eęn bruyd die verciert is hœrem manne.

* Apoc.3.c.12 end .21.c.10

3

End hoorde eęn groote stemm van dem hemel zegghen: ^* Zie, de Hutte Godes by den menschen, end hy zal by hen wonen: end zy zullen zijn volck zijn, end God zelue zal mit hen hœr God zijn.

* Ezech.43.b.7

4

^* End God zal afwisschen alle tranen van hœren ooghen, end de dood zal niet meęr zijn, noch trœrigheyt, noch gheschrey, noch moeylickheyt zal meęr zijn: ⁺ want het eęrste is voorby ghegaen.

* Esa.25.c.8 Apoc.7.d.17

+ B

5

End die op dem throon zat, zeyde: Zie ^* ick maeck het alles nieuw. End zeyde tot my: Schrijf, want deze worden zijn waerachtigh end gheloofßaem.

* Esa.43.c.19 2.Cor.5.d.17

6

End hy zeyde tot my: Het is gheschiedt. ^* Ick bin het A end het O, het be-

* Esa.41.a.4 end .44.a.6 Apoc.1.b.8. end 22.c.13

[p. 437r]

ghinn end het ende. Ick zal dem dorstighen gheuen van dem springborne des leuendighen waters om niets.

7

Wie ouerwinnt, die zal alles beæruen, ^* end ick zal zijn God zijn, end hy zal my eęn zoon zijn.

* Zach.8.b.8 Hebr.8.d.10

8

Den vertzaeghden auer end den ongheloouighen, end den veruloucktden, end den doodslagheren, end den hoerereren, end den ⁺ verghiftigheren, end den afgoden dienaren, ⁺ end allen den lœghenaren, hœr deęl zal zijn in dem poule, die mit vuer end solpher brandt: welck is de tweęde dood.

+ of, tooueraren

+ C

9

End tot my quam eęn van den zeuen Enghelen die de zeuen nappen voll hadden der lesten zeuen plaghen, end sprack mit my end zeyde: Komm, ick zal dy de Bruyd wijzen des Lamms wijf.

10

End voerde my hén im gheęst op eęnen grooten end hooghen bergh, end weeß my ^* de groote Stad het heyligh Hierusalem, hæraf dalen wt dem hemel van Gode, end had de heęrlicheyt Godes:

* Hebr.12.c.10 Apoc.21.a.2

11

End hœr klaerheyt was ghelijck dem allerkostlicksten ghesteęnte, als dem chrystalschijnighen iaspensteęne.

12

⁺End had eęnen grooten end hooghen muer, end had twælf poorten, end op den poorten twælf Enghels, end namen opgheschreuen, welcke zijn [de namen] der twælf gheslæchten der kinderen Israels.

+ D

13

Uam Oosten, dry poorten: vam Noorden, dry poorten: vam Zuyden, dry poor-

[p. 437v]

ten: [end] vam Westen dry poorten.

14

End de muer der Stad ^* had twælf gronduastigheyden, end in den zeluen de namen der twælf Apostelen des Lamms.

* Ephes.2.d.19

15

End die mit my sprack, had ^* eęnen guldenen riethalm, dat hy de Stad meten zolde, end hœre poorten, end hœren muer.

* Zach.2.a.1 Ezech.40.a.3

16

⁺End de Stad ligt vierhouckigh, end hœr lengde is alzo groot als de breędde. End hy mat de Stad mit dem [guldenen] riethalm op twælf duyzend stadywijdden: end de lengde end de breędde end de hooghde der zeluer zijn euen ghelijck.

+ E

17

End mat hœren muer honderd end vier end viertigh cubitmaten, mit eęner mate eęnes menschen, welcke [mate] is eęnes Enghels.

18

End het ghebauwsel hœrs muers was van iaspensteęne: de Stad auer van louterem golde, ghelijck dem reynen glaze.

19

End de gronduastigheyden des muers der Stad waren verciert mit allerley kostlickem ghesteęnte. ⁺ De eęrste gronduastigheyt was iaspensteęn: de ander, saphiersteęn: de derde, calcedonissteęn: de vierde, smaragdsteęn.

+ F

20

De vijfste, sardonixsteęn: de zeste, sardissteęn: de zeuende, chrysolytsteęn: de achtste, beryllsteęn: de neghenste, topasisteęn: de tiende, chrysoprassteęn: de elfste, hyacintsteęn: de twælfste, amethyststeęn.

[p. 438r]

21

End de twælf poorten waren twælf pærlen, [end] eęn ieghelicke poorte byzonder was van eęner pærle: end de strate der Stad was louter gold, als eęn doorschijnigh glaß.

22

End ick zagh daer gheęnen tempel in: want de Heęr de almachtighe God is hœr tempel end het Lamm.

23

^+* End de Stad behouft der zonnen noch des maans niet, dat zy in hœr schijnen: want de heęrlicheyt Godes verlicht ze, end het Lamm is hœr kærß.

+ G

* Esa.60.d.19 Zach.14.b.7 Apoc.22.a.5

24

^* End de volcken die dar zaligh werden, zullen in der zeluer lichte wandelen, end de kœninghen op ærden zullen hœr heęrlicheyt end eęr in de zelue bringhen.

* Esa.60.a.3

25

(End hœre poorten zullen gheęnßinns ghesloten werden des daghs: want daer zal gheęn nacht zijn.)

26

End men zal de heęrlicheyt end de eęr der Heydenen in de zelue bringhen.

27

End dar zal gheęnßinns in de zelue ingaen alles wat ghemeyn is, end wat dar gruwelickheyt end lœghen doet, dan die gheschreuen zijn ^* in dem bouck des leuens des Lamms.

* Exo.32.g.32 Psal.69.f.29 Philip.4.a.3 Apoc.3.a.5 end .20.d.12