Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xx.

1

ENd ick zagh eęnem Enghel van dem hemel afdalen, die had den slœtel tot dem afgrond, end eęn groote ketene in zyner hand.

2

^* End hy greep den draack, de olde slang, welcker is eęn duuel end Satan: end band en duyzend iaren.

* 2.Pet.2.a.4 Apoc.12.b.9

3

End warp en in den afgrond, end sloot en, end verzeghelde bouen daerop: dat hy de volcken niet meęr veruoeren zolde, tot dat vollendt wurden duyzend iaren: end daerna moet hy loß werden eęn kleyne tijd.

4

End ick zagh throonen, end zy zettden zick daerop, end hen ward ghegheuen het oordeęl: end de zielen der, die mit dem bijle onthalßt waren om des tuyghniß Iesu willen, end om des words Godes willen: ⁺ end die niet anghebeden hadden het ghedierte noch zijn beeld, end niet ghenomen hadden het mærckteęken an hœr voorhoofd end op hœr hand: deze leefden end regneerden mit Christo duyzend iaren.

+ B

5

De andere dooden auer wurden niet wederleuendigh, tot dat de duyzend iaren vollendt wurden. Dit is de eęrste opstanding.

6

Gheluckzaligh is die end heyligh, die eęn deel heeft an der eęrster opstandinghe: ouer zulcke heeft de tweęde dood

[p. 436r]

gheęn macht, mer zy zullen ^* Priesters Godes end Christi zijn, end mit hem regneren duyzend iaren.

* 1.Pet.2.a.5 Apoc.1.b.6 end .5.c.10

7

End wanneęr de duyzend iaren vollendt zullen zijn, zo zal de Satan loß werden wt zyner gheuangnisse, ⁺

+ C

8

End zal wtgaen te veruoeren de volcken die dar zijn in den vier houcken der ærden, ^* den Gog end Magog: dat hy ze verzamele in eęnem strijd, welcker ghetall is als het zand an der zeę.

* Ezech.38.a.4

9

End zy traden op de breędde der ærden, end omringden den hærlægher der Heylighen, end de gheliefde Stad: end dar viel vuer van Gode wt dem hemel, end verteerde ze.

10

End de duuel die ze veruoerde, ^* ward gheworpen in den poul des vuers end des solphers, daer het ghedierte end de valsche Propheet is, end ghepijnight zullen werden dagh end nacht van eęwigheyden tot eęwigheyden.

* Apoc.19.d.20 Daniel.7.d.1

11

⁺End ick zagh eęnen grooten witten throon, end den die daerop zat, voor welckes anghezichte vluchtde de ærde end de hemel, end hen ward gheęn plaetß gheuonden.

+ D

12

End ick zagh de dooden groot end kleyn staen voor Gode, end de boucken wurden opghedaen: End eęn ander bouck ward opghedaen, ^* welck is des leuens: end de dooden wurden ghericht wt dem dat in den boucken gheschreuen was, ^‡ na hœren wercken.

* Ex 32.g.32 Psal 69 f.29 Philip.4.a.3 Apoc.3.a.5 end .21.g.27

‡ Psal.62.d.13 Ierem.17.b.10 end .32.c.19 Matt.16.d.27 Rom.2.a.6 end .14.c.12 2.Cor.5.b.10 Gal.6.a.5 Apoc.2.f.23

13

End de zeę gaf de dooden die daerin waren, end de dood end de hell gauen de

[p. 436v]

dooden die daerin waren: end zy wurden ghericht eęn ieghelick na zynen wercken.

14

End de dood end de hell wurden gheworpen in den vuerighen poul. (Dit is de tweęde dood.)

15

End zo iemand niet ward vonden gheschreuen in dem bouck des leuens, die ward gheworpen in den vuerighen poul.