Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xix.

1

ENd daerna hoorde ick eęn stemm eęner grooter scharen in dem hemel, die zeyde: Alleluia. Zaligheyt, prijß end eęr end moghentheyt zy Gode onzem Heęre:

2

^* Want waerachtigh end rechtuærdigh zijn zyne gherichten, dat hy de groote hoere ghericht heeft, die de ærde mit hœrer hoerery verdarf, end heeft het bloed zyner dienstknechten van hœrer hand ghewroken.

* 4.Esd 15.b.28 Apo.6.c.10

3

End zy zeyden andermael, Alleluia. ^* End hœre roock ghingk op van eęwigheyden tot eęwigheyden.

* Apoc.9.a.2 end .14.c.11

4

End de vier end twintigh Olderlinghen end de vier dieren vielen neder, end baden God an, die op dem throon zat, end zeyden: Amen. Alleluia.

5

End eęn stemm ghingk van dem throone, die zeyde: Louet onzen God alle zyne dienst knechten end die en vreęzen kleyn end groot.

6

⁺End ick hoorde als eęn stemm eęner grooter scharen, end als eęn stemm veler wateren, end als eęn stemm stærcker donderslaghen, die zeyde,

+ B

[p. 434v]

Alleluia. Want [onze] Heęr de almachtighe God heeft het kœningkrijck inghenomen.

7

Latet ons verurœghen end vroylick zijn, end hem prijß gheuen: want de bruyloft des Lamms is kommen, end zijn wijf heeft zick bereydt.

8

End hœr ward ghegheuen zick te bekleęden mit fijnem reynen end schimmerenden lijnwaad. Het fijn lijnwaad auer zijn de rechtuærdighmakinghen der Heylighen.

9

End hy zeyde tot my: Schrijf, ^* Gheluckzaligh zijn die, die ten auendmael der bruyloft des Lamms gheropen zijn. End hy zeyde tot my: Dit zijn waerachtighe worden Godes.

* Mat.22.a.2 Luc.14.c.16

10

End ick viel voor zyne voeten hem an te bidden. End hy zegt tot my: ^* Zie toe dat du het niet [doest]: ick bin dijn mededienstknecht end dyner broederen, die het tuyghniß Iesu hebben: Bid God an: want het tuygniß Iesu is de gheęst der prophecyen.

* Act.10.d.20 end .14.c.14 Apoc.22.b.9

11

⁺End ick zagh den hemel opghedaen end zie, eęn witt pærd, end die daerop zat hiet Trauw end waerachtigh, end hy richt end strijdt mit gherechtigheyt.

+ C

12

^* End zyne ooghen waren als eęn vuervlamm, end op zynem hoofde vele kroonen: end had eęnen naem gheschreuen, den niemand wiste dan hy zelue.

* Apoc.1.c.14

13

^* End was bekleędt mit eęnem kleęde dat mit bloede gheuærwet was, end zyne naem heett Godes word.

* Esa.63.a.2

14

End hem volghden de hærkrachten im

[p. 435r]

hemel na op witten pærden, bekleędt mit fijnem witten end reynem lijnwaad.

15

^* End wt zynem monde gaet eęn schærp [tweęsnijdigh] zwærd, dat hy daermede de Heydens sloughe: ^‡ end hy zal ze regieren mit eęner ijzeren roude: End hy treedt de wijnstande der verbolghenheyt end des toorns des almachtighen Godes:

* Esa.49.a.2 Ephes.6.c.17 Hebr.4.c.12 Apoc.1.d.16 end .2.d.16

‡ Psal.2.c.9

16

End heeft eęnen naem gheschreuen op zynem kleęde, end op zyner hœpe, ^* Kœningk [aller] kœninghen, end Heęr [aller] heęren.

* 1.Tim.6.c.15 Apoc.17.d.14

17

End ick zagh eęnen Enghel in der zonne staen: end hy riep mit luyder stemmen, ⁺ end sprack tot allen voghelen die midden onder dem hemel vloghen: Kommet end verzamelet v tot dem auendmale des grooten Godes:

+ D

18

Dat ghy etet het vleęsch der kœninghen, end het vleęsch der duyzendhoofdmannen, end het vleęsch der stærcken, end het vleęsch der pærden, end der, die daerop zitten, end het vleęsch aller vrijen end dienstknechten, end der kleynen end der grooten

19

End ick zagh het ghedierte, end de kœninghen op ærden, end hœre hærscharen verzamelt, eęnen strijd te holden mit dem die op dem pærde zat, end mit zyner hærkracht.

20

End het ghedierte ward ghegrepen, end mit hem de valsche propheet ^* die dar teękens dede voor hem, door welcke hy veruoerde die het mærckteęken des ghediertes namen, end die zijn beeld anbaden: ^‡ leuendigh wurden deze beyde in den vuerighen poul gheworpen die mit solpher brandde.

* Apoc.13.c.13 Deu.13.a.1 mat.24 b 24 Apoc.16.c.14

‡ Apoc.20.c.10 Dani.7.d.11

[p. 435v]

21

End de anderen wurden ghedoodt mit dem zwærde deß, die op dem pærde zat, dat wt zynem monde ghingk end alle voghels wurden verzaadt van hœrem vleęsche.