Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xviij.

1

ENd daerna zagh ick eęnen anderen Enghel hæraf dalen van dem hemel, die had eęn groote macht, end de ærde ward verlicht van zyner klaerheyt.

2

End riep wt macht mit luyder stemmen, end zeyde: ^* Zy is gheuallen, zy is gheuallen de groote Babylon, end eęn behuyzing der duuelen gheworden, end eęn bewaerniß aller onreynen gheęsten, end eęn bewaerniß aller

* Apoc.14.b.8 Esa.21.c.9 Ier.51.a.8

[p. 432v]

onreyner end verhaattder voghelen.

3

Want van dem wijn der verbolghenheyt hœrer hoerery hebben alle Heydens ghedroncken: ^* end de kœninghen op ærden hebben mit hœr ghehoereert, end de koopluyden op ærden zijn van der kracht hœrer weelden rijck gheworden.

* Apoc.17.a.2

4

⁺End ick hoorde eęn ander stemm van dem hemel zegghen: ^* Gaet wt van hœr die ghy zijt mijn volck, dat ghy niet mededeęlachtigh werdet hœrer zonden, end dat ghy niet entfanghet van hœren plaghen.

+ B

* Esa.52.c.11 2.Cor.6.d.17 Gene.19.c.12

5

Want hœre zonden hebben ⁺ gheuolght tot in den hemel, end God heeft hœrer ongherechtigheyden ghedacht.

+ anders. gereyckt

6

Uergheldet hœr, ghelijck als oock zy v vergolden heeft, end maket het hœr tweęuoldigh na hœren wercken: in den drinckbeker waerin zy v ⁺ gheschoncken heeft, ⁺ schencket hœr tweęuoldigh.

+ Gr. ghemengt.

+ Gr. menghet.

7

Zo veel als zy zick zeluen heęrlich gemaeckt, end in weelden gheweeßt is, zo veel geuet hœr pijn end trœrigheyt: want zy zegt in hœrem herte: ^* Ick zit eęn kœninghinne, end bin gheęn weduwe, end trœrigheyt zal ick niet zien.

* Esa.47.b.8

8

^+* Hierom zullen hœre plaghen op eęnen dagh kommen, de dood end trœrigheyt end honghernood, end mit vuer zal zy verbrandt werden: want stærck is God de Heęr die ze richt.

+ C

* Dan.8.e.19 2.Thes.2.b.8 Esa.11.a.4

9

End het zullen ze beweęnen, end ouer ze beklagh doen ^* de kœninghen op ærden, die mit hœr ghehoereert end in weelden gheleeft hebben, wanneęr

* Apoc.17.a.2 end .18.a.3.

[p. 433r]

zy zien zullen den roock van hœrem brande,

10

End van verrens staen om der vreęzen willen hœrer pijn, end zegghen: ^* Weę, weę, de groote stad Babylon, de stærcke stad: want op eęn vre is dijn gherichte kommen.

* Esa.21.c.9 Iere.51.a.8 Apoc.14.b.8

11

End de koopluyden op ærden weęnen end trœren ouer ze: want niemand koopt meęr hœr waare. ⁺

+ D

12

De waare [des] golds end ziluers, end kostlicken ghesteęntes, end pærlen, end fijnen lijnwaads, end purpurs, end zijden, end rooßuærwighen doucks: end allerley thynen holt, end allerley ijuoorene vat, end allerley vat van dem allerkostlicksten holte, end van eeren, end van ijzer, end van marmelsteęn:

13

End kaneel, end rœckbrandsel, end zalue, end wieroock end wijn, end oly, end meelblomm, end tarwe, end veę, end schapen: end [de waare] der pærden, end waghenen, end der lichamen, end der zielen der menschen.

14

End ⁺ het ooft daer dijn ziel lust an had, is van dy hén ghegaen, end alles wat vett end heęrlick was, ⁺ is van dy hén ghegaen, end du zalt zulcks gheęnßinns meęr vinden.

+ de boomvrucht

+ E

15

De koopluyden zulcker waare die van hœr verrijckt zijn, zullen van verrens staen, om der vreęzen willen hœrer pijn, weęnen end trœren,

16

End zegghen: Weę, weę, de groote stad, die mit fijnem lijnwaad end purpur, en rooßuærwighem douck bekleędt

[p. 433v]

was end ouerghuldt was mit golde, end [verciert] mit kostlickem ghesteęnte end pærlen.

17

Want in eęner vre is zo groote rijckdomm verwoest: end alle stuermann, end alle het schipghezelschap, end de schipluyden, end alle die op der zeę hanteren, stonden van verrens,

18

⁺End kreeschen, doe zy den roock van hœrem brande zaghen, end zeyden: Wie is ghelijck dezer grooter Stad?

+ F

19

End zy worpen stoff op hœre hoofden, end kreeschen, weęnden end klaeghden, end zeyden: Weę, weę, de groote Stad, in welcker rijck gheworden zijn alle die dar schepen hadden in der zeę, van hœrer kostlickheyt: want in eęner vre is zy verwoest.

20

Uerhœgh dy ouer ze hemel, end ghy heylighe Apostels end Propheten: want God heeft uwe gherichte an hœr ghericht.

21

End eęn stærck Enghel hief eęnen steęn op als eęnen grooten mœlensteęn, end warp en in de zeę, end zeyde: ^* Alzo zal mit eęnem storm hén gheworpen werden Babylon de groote Stad, ⁺ end gheęnßinns meęr gheuonden werden.

* Iere.51.a.8

+ G

22

^* End gheęn stemm der harpenspeleren, end der zangheren, end der pijperen end der bazouneren zal meęr in dy ghehoort werden: end gheęn konstenaer eęnigher konsten zal meęr in dy gheuonden werden: end gheęn stemm der mœlen zal meęr in dy ghehoort werden.

* Ier.25.c.10

23

End gheęn licht des luchters zal

[p. 434r]

meęr in dy schijnen: ^* end gheęn stemm des bruydegomms end der bruyd zal meęr in dy ghehoort werden: want dyne koopluyden waren de voorneemsten op ærden: want door dijn ⁺ verghifting hebben ghedwaelt alle volcken.

* Ierem.16.b.9

+ of, toouery

24

End het bloed der Propheten end der Heylighen is in hœr gheuonden worden, end aller der, die op ærden gemoordt zijn.