Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap xvj.

1

ENd ick hoorde eęn groote stemm wt dem tempel, die zeyde tot den zeuen Enghelen: Gaet hén, end ghietet wt de [zeuen] nappen der verbolghenheyt Godes op de ærde.

2

End de eęrste [Enghel] ghingk hén, end goot wt zynen nap op de ærde, end dar ward eęn quaad end schadelick ghezwær an den menschen, die het mærckteęken des ghediertes hadden, end an den die zijn beeld anbaden.

3

End de tweęde Enghel goot wt zynen nap op de zeę: end het ward bloed als eęnes dooden, end alle leuendighe ziel starf in der zeę.

[p. 430r]

4

End de derde Enghel goot wt zynen nap op de waterstroomen, end op de waterbornen, end het ward bloed.

5

End ick hoorde den Enghel der wateren zegghen: Heęr, du bist gherechtigh die dar is, end die dar was, end de heylighe, ⁺ dat du zulcks gheordeęlt hebst.

+ B

6

^* Want zy hebben het bloed der Heylighen end der Propheten vergoten, end bloed hebst du hen te drincken ghegheuen: want zy zijn’s wærd.

* Mat.23.d.34

7

End ick hoorde eęnen anderen [Enghel] wt dem altaer zegghen: Ia, Heęr, die du bist de almachtighe God, dyne gherichten zijn waerachtigh end rechtuærdigh.

8

End de vierde Enghel goot wt zynen nap in de zonn: end hem ward ghegheuen de menschen te branden mit vuere.

9

End de menschen wurden ghebrandt mit grooter hitten, end lasterden den naem Godes die dar macht heeft ouer deze plaghen, end deden gheęn ghemoedbetering, hem prijß te gheuen.

10

End de vijfste Enghel goot wt zynen nap op den throon des ghediertes, end zijn kœningkrijck ward duysterigh, end zy veraten hœre tonghen van smerten,

11

End lasterden den God des hemels van hœren smerten, end van hœren zwæren, end deden gheęn ghemoedbetering van hœren wercken.

12

End de zeste Enghel goot wt zynen nap op den grooten waterstroom Euphrates: end zijn water verdrooghde, op dat bereydt wurde de wegh den kœninghen die dar zijn vam opganghe der

[p. 430v]

zonnen.

13

End ick zagh wt dem monde des draacks, end wt dem monde des ghediertes, end wt dem monde des valschen Propheten dry onreyne gheęsten [gaen] ghelijck den vorschen.

14

^* Want het zijn gheęsten der duuelen die dar teękens doen dat zy wtgaen tot den kœninghen op ærden, end op dem ganschen ærdbodem, ze te verzamelen in den strijd des grooten daghs Godes des almachtighen.

* 2.Thess.2.c.9 Apoc.13.c.14 end .19.d.20

15

^* Zie, ick komme als eęn dief: Gheluckzaligh is die dar waeckt, ^‡ end bewaert zyne kleęders, dat hy niet bloot wandele, end men niet zijn schande ziehe.

* Matt.24.d.44 Luc.12.e.39 1.Thess 5.a.2 2.Petr.3.c.10 Apoc.3.a.3

‡ 2.Cor.6.a.3 Apoc.3.d.18

16

⁺End hy verzamelde ze an eęn plaetß die dar heett op Hebreesch Armageddon.

+ D

17

End de zeuende Enghel goot wt zynen nap in de lucht: end dar ghingk wt eęn groote stemm van dem tempel im hemel, wt dem throone, die zeyde: Het is gheschiedt.

18

End dar wurden stemmen, end donderslaghen, end blixemen, end dar ward eęn groote ærdbeuing, ia zulckerley eęn ærdbeuing [end] alzo groot, welckerley niet gheweeßt is van der tijd an dat de menschen op ærden gheweeßt zijn.

19

End wt der grooter Stad wurden dry deęlen, end de steden der Heydenen vielen: end der grooter Babylon ward ghedacht voor Gode, ^* hœr te gheuen den drinckbeker des wijns van zynem grimmighen toorne.

* Iere.25.d.15

20

End alle eyland vluchtde, end gheę-

[p. 431r]

ne berghen wurden vonden.

21

End eęn groot haghel als eęn talentpond viel van dem hemel op de menschen: end de menschen lasterden God ouer de plaghe des haghels: want zijn plaghe was zeęr groot.