Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xiiij.

1

ENd ick zagh, end zie, eęn Lamm stond op dem berghe Sion, end mit hem honderd vier end viertigh duyzend die dar hadden den naem zijns Uaders ⁺ gheschreuen an hœren voorhoofden.

+ anders. brandende

2

End ick hoorde eęn stemm van dem hemel, als eęn stemm veler wateren, end als eęn stemm eęnes grooten donderslaghs: end ick hoorde eęn stemm der harpenspeleren die op hœren harpen speelden.

3

End zy zonghen als eęn nieuw ghezang voor dem throon, end voor den vier dieren end den Olderlinghen. End niemand konde het ghezang leęrnen, dan de honderd vier end viertigh duyzend die ghekocht zijn van der ærden.

4

Deze zijn’t die mit vrauwen niet beuleckt zijn: ^* want zy zijn maeghden. Deze volghen dem Lamme na, zo waer

* 2.Cor.11.a.2

[p. 428r]

het hén gaet: deze zijn ghekocht wt den menschen tot vooruruchten Gode end dem Lamme:

5

End in hœrem mond is gheęn listigheyt vonden: ⁺ want zy zijn onberispelick voor dem throon Godes.

+ B

6

End ick zagh eęnen anderen Enghel vlieghen midden door den hemel, die had eęn eęwigh Euangelium, te euangelizeren den die op ærden wonen, end allen natioene, end gheslæchte, end tonghe, end volcke,

7

End zeyde mit luyder stemmen: Ureęzet God, end gheuet hem eęr: want de vre zijns gherichtes is kommen: end biddet an den, ^* die dar ghemaeckt heeft hemel end ærde, end de zeę, end de waterbornen.

* Gen.1.a.1 Psal.33.a.6. end 124.a.8. end 146.b.6 Act.14.c.14 end .17.e.24

8

End eęn ander Enghel volghde na, end zeyde: ^‡ Zy is gheuallen, zy is gheuallen Babylon die groote stad: want zy heeft mit dem wijn des toorns hœrer hoerery ghedrenckt alle volcken.

‡ Apoc.18.a.2 Esa.21.c.9 Ierem.51.a.18

9

End de derde Enghel volghde hen na, end zeyde mit luyder stemmen: Zo iemand het ghedierte anbiddet, end zijn beeld, end neemt eęn mærckteęken an zijn voorhoofd, of an zijn hand,

10

Die zal oock van dem wijn der verbolghenheyt Godes drincken, die ghemengt is mit louterem wijn in dem drinckbeker zijns toorns: ⁺ end zal ghepijnight werden mit vuer end solpher voor den heylighen Enghelen, end voor dem Lamme.

+ C

[p. 428v]

11

^* End de roock hœrs pijnighen klimmt op van eęwigheyden tot eęwigheyden: end zy hebben gheęn rust dagh end nacht die het ghedierte anbidden end zijn beeld, end zo iemand het mærckteęken zijns naems anneemt.

* Apoc.9.a.2 end .19.a.3

12

^* Hier is de gheduldigheyt der Heylighen: hier zijn die dar holden de gheboden Godes end het ghelooue in Iesum.

* Apoc.13.c.10

13

End ick hoorde eęn stemm van dem hemel tot my zegghen: Schrijf, Gheluckzaligh zijn de dooden die in dem Heęre stæruen van nu an. Ghewißlick, zegt de Gheęst: dat zy rusten van hœrem arbeyd: hœre wercken auer volghen hen na.

14

End ick zagh, end zie, eęn witte wolck, end op der wolcke zat eęn die ghelijck was eęnes menschen zone, end had eęn guldene kroon op zynem hoofde, end in zyner hand eęn schærpe zickel.

15

⁺End eęn ander Enghel ghingk wt dem tempel, end riep mit luyder stemmen tot dem, die op der wolcke zat: ^* Sla an mit dyner zickele, end may, want de vre te mayen is dy kommen: want de ooghst der ærden is dorre gheworden.

+ D

* Ioel.3.c.13 Matt.13.e.39

16

End die op der wolcke zat, slough an mit zyner zickele an de ærde, end de ærde ward ghemayt.

17

End eęn ander Enghel ghingk wt dem tempel die in dem hemel is, die had oock eęn schærpe zickel.

18

End eęn ander Enghel ghingk wt dem altaer, die had macht ouer het vuer end riep mit luyder stemme tot dem, die de schærpe zickel had, end zeyde: Sla an

[p. 429r]

mit dyner schærper zickele, end snij de wijnrancken op ærden af: want hœre druyuen zijn rijp.

19

End de Enghel slough an mit zyner zickele an de ærde, end sneed de wijnranck op ærden, end warp ze in de groote wijnstande der verbolghenheyt Godes.

20

End de wijnstande ward buyten der stad ghetreden: end dar ghingk bloed van der wijnstande tot an de toomen der pærden ouer duyzend zeß honderd stadywijdden.