Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xiij.

[p. 426v]

1

ENd ick zagh eęn ghedierte wt der zeę opkommen, ^* dat had zeuen hoofden end tien hoornen, end op zynen hoornen tien kroonen, end op zynen hoofden eęnen naem der lastering.

* Apoc.17.c.9.12 Dan.7.f.20

2

End het ghedierte dat ick zagh was ghelijck eęnem pardel, end zyne voeten als bæren voeten, end zyne mond als eęnes leęuwen mond. End de draack gaf hem zijn gheweld, end zynen throon, end eęn groote macht.

3

End ick zagh zyner hoofden eęn als doodlick verwondt, end zijn doodlicke wonde ward gheheylt: end men verwonderde zick ouer der ganscher ærde des ghediertes:

4

End zy baden den draack an die dem ghedierte macht gaf, end zy baden het ghedierte an, end zeyden: Wie is dem ghedierte ghelijck? Wie kann mit hem krijghen? ⁺

+ B

5

End hem ward ghegheuen eęn mond te spreken groote dinghen end lasteringhen: end hem ward macht ghegheuen te handelen tweę end viertigh maanden.

6

End het dede zynen mond op ter lasteringhe teghen God, te lasteren zynen naem end zijn Hutte, end die in dem hemel wonen.

7

^* End hem ward ghegheuen strijd te voeren mit den Heylighen, end ze te ouerwinnen: end hem ward macht ghegheuen ouer alle gheslæchte end tong end natioen.

* Dan.7.f.21 Apoc.11.b.7

8

End alle die op ærden wonen, zullen

[p. 427r]

het anbidden, ^* welcker namen niet gheschreuen zijn in dem bouck des leuens des Lamms, dat dar gheslachtet is van anbeghinne der wæreld.

* Apoc.3.a.5 end .20.d.12 end .21.g.27 Philip.4.a.3

9

Heeft iemand ooren, die hoore.

10

Zo iemand in gheuangniß voert, die gaet hén in gheuangniß: ^{+ *} zo iemand mit eęnem zwærde doodt, die moet oock mit eęnem zwærde ghedoodt werden. ^* Hier is de gheduldigheyt end het ghelooue der Heylighen.

+ C

* Gene.9.a.6 Matt.26.e 51

* Apoc.14.c.12

11

End ick zagh eęn ander ghedierte opkommen van der ærden, end had tweę hoornen ghelijck als eęn lamm, end sprack als eęn draack.

12

End het doet alle de macht des eęrsten ghediertes voor hem, end maeckt dat de ærde end die daerop wonen het eęrste ghedierte anbidden, welckes doodlicke wonde gheheylt was.

13

^* End doet groote teękens, alzo dat het oock doet vuer van dem hemel vallen op ærden voor den menschen:

* 2.Thes.2.c.9

14

^* End veruoert die op ærden wonen om der teękenen willen die hem ghegheuen zijn te doen voor dem ghedierte, ⁺ end ghebiedt den, die op ærden wonen, dat zy dem ghedierte eęn beeld maken, dat de wonde van dem zwærde had, end leuendigh gheworden was.

* Deut.13.a.1 mat 24.b.24 Apoc.16.c.14 end .19.d.20

+ D

15

End hem ward ghegheuen dat het dem beelde des ghediertes eęnen gheęst gaue, dat des ghediertes beeld oock sprake: end dat het maeckte, dat zo wie des ghediertes beeld niet anbaden, ghedoodt wurden:

[p. 427v]

16

End het maeckt alle t’zamen, de kleynen end de grooten, oock de rijcken end de armen, oock de vrijen end de dienstknechten dat het hen eęn mærckteęcken gheue in hœr rechte hand, of an hœr voorhoofd:

17

End dat niemand koopen of verkoopen kann, hy hebbe dan het mærckteęken, of den naem des ghediertes, of het ghetall zijns naems.

18

Hier is de wijßheyt. Wie verstand heeft, die berekene het ghetall des ghediertes: want het is eęnes menschen ghetall, end zijn ghetall is zeß honderd zeß end zestigh.