Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.x.

1

ENd ick zagh eęnen anderen stærcken Enghel van dem hemel hæraf kommen, bekleędt mit eęner wolcke, end eęn reghenboogh was op zynem hoofde: end zijn anghezicht was als de zonn, end zyne voeten als vuerighe pilaers.

2

End hy had in zyner hand eęn boucksken opghedaen: end hy zettde zynen rechten voet op de zeę, den lincken auer op de ærde,

3

End riep mit luyder stemmen, ghelijck als eęn leęuw briescht: ⁺ end doe hy gheropen had, spraken de zeuen donderslaghen hœre stemmen.

+ B

4

End doe de zeuen donderslaghen hœre stemmen ghesproken hadden, zolde ick ze gheschreuen hebben: end ick hoorde eęn stemm van dem hemel tot my zegghen: Uerzeghel wat de zeuen donderslaghen ghesproken hebben, end de zelue schrijf niet.

5

^* End de Enghel den ick zagh staen op de zeę end op de ærde, hief zijn hand op na dem hemel,

* Dani.12.b.7

6

End zwour by dem Leuendighen van eęwigheyden tot eęwigheyden, die den hemel gheschapen heeft, ⁺ end wat daerin is, end de ærde, end wat daerin is, end de zeę, end wat daerin is, dat voordan gheęn tijd meęr zijn zolde:

+ C

[p. 423v]

7

Mer dat in den daghen der stemmen des zeuenden Enghels, wanneęr hy bazounen zal, oock vollendight zolde werden de verborghenheyt Godes, ghelijck hy gheeuangelizeert heeft zynen dienstknechten den Propheten.

8

End de stemm die ick hoorde van dem hemel, sprack andermael mit my, ende zeyde: Ga hén, neem het open boucksken van der hand des Enghels die dar staet op der zeę end op der ærde.

9

End ick ghingk hén tot dem Enghel, ende zeyde tot hem: Gheef my het boucksken. ⁺ End hy zeyde tot my: ^* Neem het hén, end eet het op: end het zal dynen buyck verbitteren, mer in dynem monde zal het zuet zijn als honigh.

+ D

* Ezech.3.a.1

10

End ick namm hec boucksken van der hand des Enghels, end at het op: end het was zuet in mynem monde als honigh: end doe ick het opgheéten had, ward myne buyck verbittert.

11

End hy zegt tot my: Du moetst wederom propheteren ouer volcken end Heydenen, end tonghen, end vele kœninghen.