Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ix.

1

EEnd de vijfste Enghel bazounde, end ick zagh eęn sterr gheuallen van dem hemel op de ærde: end hem ward ghegheuen de slœtel tot dem putte des afgronds.

2

End hy dede den putt des afgronds op, ^* end dar ghingk eęn roock wt dem putte als eęn roock eęnes grooten ouens: end de zonn ward verduystert, end de lucht van dem roock des puts.

* Apoc.14.c.11 end .19.a.3

3

End wt dem roock quamen springhanen op de ærde, end hen ward macht ghegheuen, ghelijck als de scorpioenen op ærden macht hebben.

4

End dar ward tot hen ghezegt ^* dat zy niet beschadighen zolden het graß op ærden, noch eęnigh groen, noch eęnighen boom, ^* dan alleęne de menschen die niet hebben den zeghel Godes an hœren voorhoofden.

* Apoc.7.a.3

* Ezech.9.b.5

[p. 422r]

5

End het ward hen ghegheuen dat zy ze niet doodden, mer dat zy ze pijnighden vijf maanden lang: end hœr pijnighen was als het pijnighen eęnes scorpioens wanneęr hy eęnen mensch slaet.

6

^* End in den zeluen daghen zullen de menschen den dood zoucken, end zullen en niet vinden: ⁺ end zullen begæren te stæruen, end de dood zal van hen vliehen.

* Apoc.6.d.16 Esa.2.d.19 Iere.8.b.3 Osee.10.b.8. Luc.23.d.29

+ B

7

^‡ End de springhanen waren na den ghedaenten ghelijck den pærden die ten strijde toegherust zijn: end op hœren hoofden als kroonen dem golde ghelijck, end hœre anghezichten ghelijck als menschen anghezichten.

‡ Exo.10.a.4. Sap.16.b.9.

8

End hadden haar als vrauwen haar, end hœre tanden waren als der leęuwen.

9

End hadden borstwapens als ijzere borstwapens, end het ruyschen hœrer vlœghelen als het ruyschen der waghenen die mit velen pærden ten krijghe loopen.

10

End hadden stærten ghelijck den schorpioenen, end dar waren anghels an hœren stærten, end hœr macht was te beschadighen de menschen vijf maanden lang.

11

End hebben ouer zick eęnen kœningk, den enghel wt dem afgrond, welckes naem heett op Hebreesch Abaddon: ⁺ end op Griecksch is zyne naem ⁺ Apollyon.

+ C

+ dat is, Uerdæruer.

12

Eęn weę is hénwegh, zie, dar kommen noch tweę weę daerna.

13

End de zeste Enghel bazounde, end ick hoorde eęn stemm wt den vier ⁺ houcken des guldenen altaers die voor Gode is,

+ Gr. hoornen

[p. 422v]

14

Welcke zeyde tot dem zesten Enghel die de bazoun had: Ontbind de vier Enghels die dar ghebonden zijn an dem grooten waterstroom Euphrates.

15

End de vier Enghels wurden ontbonden, die bereyd waren op eęne vre, end op eęnen dagh, end op eęn maand, end op eęn iaar, dat zy doodden het derde deęl der menschen.

16

End het ghetall der ruyterschen krijgheren was tweę duyzendmael honderd duyzend. End ick hoorde hœr ghetall.

17

End alzo zagh ick de pærden in dem ghezichte: end die daerop zaten dat zy hadden vuerighe end purpuruærwighe end solpherene borstwapens, end de hoofden der pærden als leęuwen hoofden, end wt hœren monden ghingk vuer end roock end solpher.

18

⁺Uan dezen dryen ward ghedoodt het derde deęl der menschen, van dem vuere, end van dem roock, end van dem solpher, die wt hœren monden ghingk.

+ D

19

Want hœre kracht is in hœrem mond, [end in hœren stærten.] Want hœre stærten zijn ghelijck den slanghen, end hebben hoofden, end mit den zeluen doen zy schade.

20

End het ouerblijfsel der menschen die niet ghedoodt wurden van dezen plaghen, noch ghemoedbetering deden van den wercken hœrer handen, dat zy niet anbaden de duuels, ^* end de guldene, end de ziluerene, end de metalene, end de steęnene, end de holtene afgoden, welcke noch zien noch hooren noch wandelen

* Psal.115.a.4 end .135.d.15

[p. 423r]

konnen,

21

Hebben oock gheęn ghemoedbetering ghedaen van hœrer moordery, noch van hœrer ⁺ verghiftinghe, noch van hœrer hoerery, noch van hœrer dieuery.

+ of. toouerye