Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.viij.

1

ENd doe het den zeuenden zeghel opdede, ward dar eęn stilheyt in dem hemel by eęner haluer vren.

2

End ick zagh zeuen Enghels voor Gode staen, end hen wurden zeuen bazounen ghegheuen.

3

End eęn ander Enghel quam, end stond voor dem altaer, end had eęn guldene wieroockuat: end hem ward veel rœckbrandsels ghegheuen, dat hy gaue van den ghebeden aller Heylighen op den guldenen altaer, die voor dem

[p. 421r]

throon is.

4

^+* End de roock des rœckbrandsels van den ghebeden der Heylighen ghingk op van der hand des Enghels, voor Gode.

+ B

* Psal.141.a.2

5

End de Enghel namm het wieroockuat, end vulde dat mit vuere van dem altaer, end warp het op de ærde: end dar wurden stemmen end donderslaghen, end blixemen, end ærdbeuinghen.

6

End de zeuen Enghels die de zeuen bazounen hadden, bereydden zick te bazounen.

7

End de eęrste Enghel bazounde, end dar ward eęn haghel end vuer mit bloede ghemengt, end wurden gheworpen op de ærde, end het derde deęl der boomen verbrandde, end alle groen graß verbrandde. ⁺

+ C

8

End de tweęde Enghel bazounde, end dar ward wat gheworpen als eęn groote bergh mit vuer brandende, in de zeę: end het derde deęl der zeę ward bloed.

9

End het derde deęl der creatueren die in der zeę waren end leefden, starf: end het derde deęl der schepen wurden verdoruen.

10

End de derde Enghel bazounde, end dar viel eęn groote sterr van dem hemel, die brandde als eęn fackel, end viel op het derde deęl der waterstroomen, end op de waterbornen.

11

End de naem der sterre hiet Alssen: end het derde deęl [der wateren] ward alssen: end vele menschen storuen van den wateren, ⁺ daerom dat zy waren bitter ghe-

+ D

[p. 421v]

worden.

12

End de vierde Enghel bazounde, end het derde deęl der zonnen ward gheslaghen, end het derde deęl des maans, end het derde deęl der sterren: alzo dat het derde deęl der zeluer verduystert ward, end de dagh het derde deęl niet scheen, end de nacht deßghelijcken.

13

End ick zagh, end hoorde eęnen Enghel vlieghen midden door den hemel, end zegghen mit luyder stemmen: Weę, weę, weę den, die op ærden wonen, voor den anderen stemmen der bazounen der dryer Enghelen die noch bazounen zullen.