Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.vj

[p. 418v]

1

ENd ick zagh, doe het Lamm der [zeuen] zeghelen eęnen opdede, end ick oorde der vier dieren eęn zegghen als mit eęnes donderslaghs stemme: Komm end zie.

2

End ick zagh, end zie, eęn witt pærd end die daerop zat had eęnen boogh, end hem ward ghegheuen eęn kroon, end hy toogh wt te ouerwinnen, end dat hy ouerwonne.

3

End doe het den tweęden zeghel opdede hoorde ick het tweęde dier zegghen: Komm end zie.

4

End dar ghingk hærwt eęn ander pærd, dat was rood, end dem die daerop zat ward ghegheuen den vrede te nemen van der ærden, dat zy oock malckanderen moorden zolden: end hem ward ghegheuen eęn groot zwærd.

5

End doe het den derden zeghel opdede, hoorde ick het derde dier zegghen: Komm, end zie. ⁺ End ick zagh, end zie, eęn zwart pærd: end die daer op zat, had eęn waghe in zyner hand.

+ B

6

End ick hoorde eęn stemm midden onder den vier dieren zegghen: Eęn daghkostmaat tarwen om eęnen penningk: end dry daghkostmaten gærsten om eęnen penningk: end der oly end dem wijne doe gheęn schade.

7

End doe het den vierden zeghel opdede, hoorde ick de stemm des vierden diers zegghen: Komm end zie.

8

End ick zagh, end zie, eęn valuw pærd, end die daerop zat, deß naem hiet de Dood: end de Hell volght mit hem: end hen

[p. 419r]

ward macht ghegheuen te dooden ouer het vierde deęl der ærden, mit zwærde, end mit honghernood, end mit dood, ⁺ end door ghedierten der ærden.

+ C

9

End doe het den vijfsten zeghel opdede, zagh ick onder dem altaer de zielen der, die ghemoordt waren om des words Godes willen, end om des tuyghniß willen, dat zy hadden.

10

End zy riepen mit luyder stemmen end zeyden: ^* [Die du bist] de Heęr de Heylighe end de waerachtighe, hoe lang richtest du, end wreeckest niet onze bloed an den, die op ærden wonen?

* 4 Esd.15.b.21 Apoc.19.a.2

11

End hen wurden ghegheuen eęnem ieghelicken witte kleęders: end dar ward tot hen ghezegt dat zy noch eęne kleyne tijd berustden, tot dat oock hœre mededienstknechten end hœre broeders veruult wurden, die oock ghedoodt zolden werden ghelijck als zy.

12

End ick zagh, doe het den zesten zeghel opdede, end zie, dar ward eęn groote ærdbeuing: ⁺ end de zonn ward zwart als eęn haarene zack, end de maan ward als bloed,

+ D

13

End de sterren des hemels vielen op de ærde: ghelijck als eęn wijghboom zyne ontijdighe vijghen afwærpt, wanneęr hy van grootem winde beweeght werdt:

14

End de hemel entweeck als eęn bouck dat toegherolt werdt: end alle ghebergte end eyland wurden beweeght van hœren plaetsen.

15

End de kœninghen op ærden, end

[p. 419v]

de groot gheachtden, end de rijcken, end de duyzendhoofdluyden, end de machtighen, end alle dienstknechten, end alle vrijen verberghden zick in kuylen, end in steęnrootsen in den berghen:

16

End zeyden tot den berghen end steęnrootsen: ^* Uallet op ons, end verberghet ons voor dem anghezichte deß die op dem throon zit, end voor dem toorne des Lamms:

* Esa.2 d.19 Osee.10.b.8 Luc.23.d.29 Apoc.9.b.6

17

Want de groote dagh zijns toorns is kommen, end wie kann bestaen?