Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

[p. 417v]

Cap.v.

1

ENd ick zagh in der rechter hand deß, die op dem throon zat, ^* eęn bouck gheschreuen inwendigh end wtwendigh, end verzeghelt mit zeuen zeghelen.

* Ezech.2.d.10

2

End ick zagh eęnen stærcken Enghel prediken mit luyder stemmen: Wie is wærdigh het bouck op te doen, end zyne zeghels op te breken?

3

End niemand im hemel, noch op ærden, noch onder der ærden konde het bouck opdoen, noch daerin zien.

4

End ick weęnde zeęr, dat niemand wærdigh gheuonden ward het bouck op te doen, noch te lezen, noch daerin te zien.

5

End eęn van den Olderlinghen zegt tot my: Weęn niet: zie, ^* de Leęuw die dar is van dem gheslæchte Iuda, ^{+ ‡} de Wortel Dauids, heeft ouerwonnen op te doen het bouck, end op te breken zyne zeuen zeghels.

* Gene.49.b.9

+ B

‡ Esa.11.c.10 Rom.15.c.12 Apoc.22.c.16

6

End ick zagh, end zie, midden in dem throon, end der vier dieren, end midden onder den Olderlingen stond eęn ⁺ Lamm als ware het gheslachtet, end had zeuen hoornen end zeuen ooghen: welcke zijn de zeuen gheęsten Godes die dar zijn wtghezonden in alle het land:

+ Gr. lammeken.

7

End het quam, end namm het bouck wt der rechter hand deß, die op dem throon zat.

8

End doe het het bouck namm, vielen de vier dieren end de vier end twintigh Olderlinghen voor het Lamm neder, ⁺ end hadden eęn ieghelick harpen, end gulde-

+ C

[p. 418r]

ne nappen voll rœckbrandsels, welcke zijn de ghebeden der Heylighen:

9

End zonghen eęn nieuw ghezang, end zeyden: ^* Du bist wærdigh te nemen het bouck, end op te doen zyne zeghels: want du bist gheslachtet, ^* end hebst ons Gode ghekocht mit dynem bloede wt allerley gheslæchte, end tonghe, end volcke, end natioene:

* Apoc.4.d.11

* Act.20.f.28 Ephes.1.b.7 Colos.1.b.14 Hebr.9.c.12 end .10.b.10 1.Pet.1.d.19 1.Ioan.1.b.7

10

^‡ End du hebst ons Gode tot Kœninghen end Priesteren ghemaeckt: end wy zullen regneren op ærden.

‡ 1.Pet.2.b.9 Apoc.1.b.6 Exod.19.a.3

11

End ick zagh, end hoorde eęn stemm veler Enghelen in dem ommringk des throons, end der dieren, end der Olderlinghen: end [het ghetall was] ^* veel duyzendmael duyzend,

* Dan.7.c.10

12

⁺Welcke zeyden mit luyder stemmen: ^* Het Lamm dat gheslachtet is, is wærdigh te nemen kracht, end rijckdomm, end wijßheyt, end stærckheyt, end eęr, end prijß, end zeghening.

+ D

* Apoc.4.d.11

13

End alle schepsel dat in dem hemel is, end dat op ærden, end onder der ærden, end in der zeę is, oock alles wat daerin is, hoorde ick zegghen, Dem die dar zitt op dem throon end dem Lamme zy zeghening, end eęr, end prijß, end gheweld van eęwigheyden tot eęwigheyden.

14

End de vier dieren zeyden: Amen. End de vier end twintigh Olderlinghen vielen neder, end baden an den, die dar leeft van eęwigheyden tot eęwigheyden.