Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iiij.

1

DAerna zagh ick, end zie, eęn dœr ward opghedaen in dem hemel: end de eęrste stemm die ick hoorde, was als eęner bazounen, welcke mit my sprack, end zeyde: Komm hærop, end ick zal dy toonen wat na dezem gheschiehen zal.

2

End van stonden an was ick im gheęst: end zie, eęn throon ward ghezett in dem hemel, end op dem throon zat eęner.

3

End die dar zat, was ghelijck an te zien als eęn Iaspensteęn end Sardensteęn, end eęn reghenboogh was rond om den throon ghelijck an te zien als eęn Smaragdsteęn.

4

⁺Oock omm den throon waren vier end twintigh throonen: end op den throonen zagh ick zitten vier end twintigh Olderlinghen mit witten kleęderen bekleędt, end hadden op hœren hoofden guldene kroonen.

+ B

5

End van dem throone ghinghen wt blixems, end donderslaghen end stemmen:

[p. 417r]

end zeuen fackels mit vuere, brandden voor dem throon, welcke zijn de zeuen gheęsten Godes.

6

End voor dem throon was ^* eęn glazene zeę ghelijck dem crystalle: end midden in dem throon, ⁺ end in dem omringk des throons vier dieren voll ooghen voor end achter.

* Apoc.15.a.2

+ C

7

End het eęrste dier was ghelijck eęnem leęuwe: end het tweęde dier was ghelijck eęnem kalue: end het derde dier had het anghezicht als eęn mensch: end het vierde dier ghelijck eęnem vlieghenden arend.

8

End der vier dieren hadden eęn ieghelick zeß vlœghels ringswijß ommhær, end waren van binnen voll ooghen: end zy hebben gheęn rust dagh end nacht, end zegghen, ^* Heyligh, heyligh, heyligh is God de Heęr de Almachtighe, Die dar was, end die dar is, end die dar toekomstigh is.

* Esa.6.a.3

9

⁺End doe de dieren prijß end eęr end danck gheuen zolden dem die op dem throon zat, die dar leeft van eęwigheyden tot eęwigheyden,

+ D

10

Uallen de vier end twintigh Olderlinghen neder voor dem, die op dem throon zat: end bidden an den, die dar leeft van eęwigheyden tot eęwigheyden: end wærpen hœre kroonen voor den throon,

11

End zegghen: ^* Heęr, du bist wærdigh te nemen prijß end eęr end kracht: want du hebst alle dinghen gheschapen, end om dynent willen hebben zy het wezen, end zijn gheschapen.

* Apoc.5.c.9 d.12